Yn dilyn cwestiwn treiddgar i’r Prif Weinidog, mae’r Aelod o'r Senedd dros Aberconwy - Janet Finch-Saunders AS - wedi croesawu’r newyddion bod ei chynigion adeiladol i amserlennu gwasanaethau min nos rhwng Llandudno a Blaenau Ffestiniog, ac i gyflwyno gwasanaeth trên uniongyrchol rhwng Maes Awyr Manceinion a Blaenau Ffestiniog, nawr yn cael ei godi gan Weinidog Gogledd Cymru drwy ei gwaith gyda Trafnidiaeth Cymru.
Daeth ei hymyriad wrth i etholwyr wynebu’r cyfyng-gyngor o dalu ffioedd tacsi costus o gofio bod y trên olaf yn gadael am 16:07 pm a’r bws olaf am 18:34 pm. Wrth awgrymu gwasanaethau trên hwyr fel ateb, mynegodd Mrs Finch-Saunders bryderon hefyd y bydd twristiaid yn gyrru eu hunain i Barc Cenedlaethol Eryri.
Wrth gyfeirio at ei chwestiwn i’r Prif Weinidog, dywedodd Janet:
“Mewn argyfwng hinsawdd, rwy’n glir bod angen i ni rymuso trigolion i ddefnyddio trafnidiaeth gyhoeddus. Er ein bod wedi gweld rhywfaint o gynnydd o ran cyrraedd cymunedau gwledig drwy wasanaeth bws Fflecsi Dyffryn Conwy, y gwir amdani yw bod y cysylltiad rhwng cymunedau yn Nyffryn Conwy a’r arfordir yn dod i ben gyda’r nos.
“Wrth dynnu sylw’r Prif Weinidog at y gwahaniaeth annerbyniol hwn heddiw, a chynnig ateb tymor byr synhwyrol drwy’r rhwydwaith rheilffyrdd, roeddwn yn falch iawn o gael cadarnhad y bydd Gweinidog Gogledd Cymru nawr yn cydweithio â Trafnidiaeth Cymru i adolygu’r posibilrwydd o wasanaethau gyda’r nos rhwng Llandudno a Blaenau Ffestiniog.
“Rwy’n gobeithio nawr y bydd y cam cadarnhaol hwn ymlaen yn caniatáu i Lywodraeth Cymru gyflwyno’r diwygiadau angenrheidiol i Raglen Metro Gogledd Cymru yn y dyfodol er mwyn cynnwys gwasanaeth trên uniongyrchol rhwng Blaenau Ffestiniog a Manceinion a fyddai’n cefnogi cynnydd pellach yn nifer yr ymweliadau â’r ardal ar drafnidiaeth gyhoeddus.”
DIWEDD
Llun: Janet Finch-Saunders AS/MS
