Mae Janet Finch-Saunders AS, Aelod o’r Senedd dros Aberconwy, wedi codi pryderon gyda gweithredwyr Bwrdd Iechyd Prifysgol Betsi Cadwaladr, yn dilyn honiadau gan etholwyr oedrannus eu bod yn gweld cyfnodau aros hir, y tu allan yn y tywydd garw, i dderbyn eu pigiad atgyfnerthu Covid-19.
Mae Janet wedi ysgrifennu at Jo Whitehead, Prif Weithredwr y Bwrdd Iechyd, i amlinellu ei phryderon a gofyn i’r Bwrdd gynghori ar ba gamau y gellir eu cymryd i fynd i’r afael ag amseroedd aros hir a gwella gofal cleifion wrth iddynt aros. Mae’r Aelod hefyd wedi cysylltu â Rheolwr Rhaglen Frechu’r Bwrdd Iechyd i egluro ei phryderon.
Wrth drafod ei phryder, dywedodd Janet:
“Mae llwyddiant y rhaglen frechu Covid-19 ledled etholaeth Aberconwy yn dangos pa mor galed mae ein gweithlu a gwirfoddolwyr lleol yn gweithio, ymhob ffordd, ac maent wedi dal ati i sicrhau bod ein preswylwyr yn cael eu diogelu a chynnig y cyfle i wella.
“Mae llawer o etholwyr wedi anfon negeseuon e-bost graslon at fy swyddfa yn canmol gwaith diflino’r rhai sy’n gweithio ar y rhaglen frechu hon. Fodd bynnag, rwy’n clywed mwy a mwy o honiadau gan bobl fwyaf bregus ein cymdeithas eu bod yn gorfod aros yn yr awyr agored, mewn tywydd oer a garw, i dderbyn eu pigiad atgyfnerthu.
“Cyfrifoldeb Bwrdd Iechyd Betsi Cadwaladr yw gweinyddu’r rhaglen atgyfnerthu newydd hon ac rwyf wedi ysgrifennu at Brif Weithredwr y Bwrdd yn amlinellu fy mhryderon a gofyn iddi pa gamau y dylid eu cymryd i leihau amseroedd aros hir a gwella gofal y rhai sy’n aros.
“Yn y cyfamser, rwy’n erfyn ar fy holl etholwyr i fynd i’r ganolfan frechu ar yr amser a nodir ar eu gwahoddiad a ddim cyn hynny. Tra bod dod i apwyntiad yn gynnar yn arwydd o gwrteisi a brwdfrydedd fel arfer, yn yr achos hwn gallai fod yn cyfrannu at amseroedd aros hir.
DIWEDD
Ffoto: Janet Finch-Saunders AS
