Mae Janet Finch-Saunders AS – Aelod o’r Senedd dros Aberconwy – wedi canmol y gwaith sy’n cael ei wneud gan Cartrefi Conwy i ailddatblygu Glanrafon yn Llanrwst, gan gynnwys cynigion am gynllun cartrefi modiwlaidd newydd sy’n ceisio gwella effeithlonrwydd gwres a mynd i’r afael â newid hinsawdd.
Cafodd Mrs Finch-Saunders ei thywys o gwmpas y safle gydag Andrew Bowden, Prif Weithredwr y grŵp. Hefyd yn bresennol roedd Daniel Hall (Cyfarwyddwr Cynorthwyol Cymdogaethau), Bill Hunt (Aelod o’r Bwrdd), Matthew Stowe (Swyddog Datblygu Amgylcheddol), Owain Roberts (Cyfarwyddwr Cynorthwyol Asedau a Diogelwch Tenantiaid), a David Kelsall (Cyfarwyddwr Cynorthwyol Datblygu a Thwf).
Mae’r cynllun yn cynnwys adeiladu un deg pedwar cartref newydd, i gyd yn gymysgedd o eiddo 3 a 4 ystafell wely, a’r gobaith yw y bydd hyn yn helpu i gryfhau’r stoc tai yn lleol. Bydd y gwaith hefyd yn uwchraddio a gwella’r man chwarae plant presennol sydd yng nghanol y safle.
Gan roi sylwadau ar ei ymweliad, meddai Janet:
"Roedd hi’n braf iawn cael ymweld â safle Glanrafon yn Llanrwst i glywed am gynlluniau uchelgeisiol a gwyrdd Cartrefi Conwy sy’n diogelu ar gyfer y dyfodol wrth wneud yr ailddatblygiad hwn. Nid yn unig ei fod yn ymateb i’r risgiau a ddaw yn sgil Newid Hinsawdd, ond mae hefyd yn ceisio uno’r gymuned drwy greu mannau chwarae mentrus newydd i’r gymuned.
“Mae’r cartrefi newydd yn ychwanegu at y stoc tai lleol a byddant yn cael eu hadeiladu drwy ddefnyddio dull adeiladu modiwlaidd arloesol a fydd yn anhygoel o effeithlon o ran ynni, a dim ond un rheiddiadur fydd ei angen i gynhesu’r eiddo cyfan. Dyma’r union fath o arloesedd adeiladu cartrefi a fydd yn gwneud gwahaniaeth mawr i’n lles.
“Datgelodd adroddiad diweddar CCRA3 y bydd rheoleiddio tymheredd yn ein cartrefi yn hollbwysig os ydym am ddiogelu iechyd y cyhoedd. Trwy roi pwyslais ar inswleiddio a llif tymheredd, bydd y gwaith sy’n cael ei wneud ar draws y safle hwn yn helpu i arbed arian ac achub y blaned.
“Yn fy rôl fel Gweinidog yr Wrthblaid dros Newid Hinsawdd, roeddwn wedi ysgrifennu at Andrew i archwilio sut mae ein Landlordiaid Cymdeithasol Cofrestredig yn gwireddu’r heriau a ddaw yn sgil hinsawdd sy’n newid. Wrth ymweld â’r safle, roedd hi’n hyfryd gweld ymrwymiadau yn cael eu troi’n gamau ymarferol.
Meddai siaradwr ar gyfer Cartrefi Conwy:
"Mae datblygiad Glanrafon yn Llanrwst yn rhan o raglen adfywio ehangach yn yr ardal. Rydym yn adeiladu 14 cartref teulu i safon PassivHaus sy’n golygu arbedion ynni enfawr i’n tenantiaid. Adeiladwyd y fframiau pren ar gyfer y cartrefi hyn yn ein ffatri ein hunain, Atebion Modiwlaidd Creu Menter, sy’n creu cyfleoedd cyflogaeth newydd ar gyfer ein tenantiaid.
Ni fyddai dim o hyn wedi bod yn bosibl heb gymorth cyllid Rhaglen Tai Arloesol Llywodraeth Cymru. Rydym yn edrych ymlaen yn fawr at groesawu teuluoedd i’r cartrefi hyfryd hyn yn y flwyddyn newydd.”
DIWEDD
Ffoto: Janet Finch-Saunders AS
