Yn dilyn ymyriad gan Janet Finch-Saunders AS - Aelod o’r Senedd Aberconwy - yn y Senedd heddiw, mae Llywodraeth Cymru wedi cadarnhau y bydd yn sicrhau y bydd cyllid ar gyfer diffibrilwyr yn amodol ar gofrestru ar The Circuit. Mae Sefydliad Prydeinig y Galon yn lansio The Circuit ar y cyd â Chymdeithas y Prif Weithredwyr Ambiwlans, Ambiwlans Sant Ioan a Resuscitation Council UK.
Galwodd ei haraith hefyd am gyflwyno arwyddion ffyrdd AED amlwg a phwysleisiodd ei diolch i’w chyn gydweithiwr, Suzy Davies, a ymgyrchodd i wneud dysgu sgiliau achub bywyd yn ofynnol yn y cwricwlwm ysgol newydd.
Yn rhoi sylwadau ar ei hymyriad, dywedodd Janet:
“Mae Sefydliad Prydeinig y Galon Prydain wedi amcangyfrif y gallai fod cannoedd neu hyd yn oed miloedd o ddiffibrilwyr mewn cymunedau ledled Cymru sydd byth yn cael eu defnyddio gan nad yw’r gwasanaethau brys yn gwybod lle maen nhw. Dyna pam roeddwn i am weld cofrestru gyda’r fenter The Circuit yn dod yn amod am gyllid.
“Rwyf wrth fy modd bod Llywodraeth Cymru am fabwysiadu’r awgrym hwn. Gyda 2,800 o achosion o ataliad y galon mewn ysbytai yng Nghymru bob blwyddyn, gwyddom y gall CPR ar unwaith a diffibrilio fwy na dyblu’r siawns i oroesi. Mae gwybod lle mae’r peiriannau hyn yn hollbwysig i achub bywyd.
“Mae llawer o bobl yn teithio ar hyd a lled Cymru bob wythnos. Ar fy nheithiau i lawr i’r Senedd o’m hetholaeth yn Aberconwy, dim ond un AED rydw i wedi sylwi arno – ger yr A5 ym Mhadog, Ysbyty Ifan. Dyma dystiolaeth glir o anfantais ddaearyddol.
“Dylai cymunedau sydd â chyfarpar achub bywyd fod ag arwyddion amlwg yn hysbysu’r cyhoedd o’u presenoldeb. Dylent fod mor bwysig ag arwyddion twristiaeth brown, felly mae’n hollbwysig bod Gweinidogion Llywodraeth Cymru yn cydweithio ar draws yr adrannau i sicrhau arwyddion ffyrdd ar gyfer AED.
“Dylem hefyd gondemnio, yn ddiamwys, pwy bynnag a oedd yn gyfrifol am ymosod ar AED yn Nhraeth Pen Morfa, Llandudno. Mae gwallgofrwydd llwyr y fandaliaeth yn dangos bod angen codi ymwybyddiaeth o bwysigrwydd AED a CPR.”
DIWEDD
Ffoto: Janet Finch-Saunders AS
