Heddiw, bu Janet Finch-Saunders AS - Aelod o’r Senedd Aberconwy - yn ymweld â Digwyddiad Coffi Cymunedol yng Nglan Conwy, i glywed am bryderon etholwyr ac ateb cwestiynau gan breswylwyr. Mae’r Digwyddiad Coffi Cymunedol yn achlysur cymunedol a chyfeillgar, gan gynnig amgylchedd diogel i breswylwyr wau, sgwrsio a dal i fyny gyda ffrindiau.
Wrth groesawu’r digwyddiadau fel hyn yn ôl, dywedodd Janet:
“Gydol toriad y Senedd dros yr haf, rydw i wedi cael y pleser o deithio’r etholaeth i glywed gan fusnesau a phreswylwyr er mwyn cael gwell syniad o sut mae’r etholaeth yn taro’n ôl ar ôl y pandemig. Roeddwn i ar ben fy nigon o gael fy ngwahodd i ymuno â’r gwragedd yn Nigwyddiad Coffi Cymunedol Glan Conwy.
“Diddorol iawn hefyd oedd gweld y paratoadau sy’n cael eu cynnal nawr i adeiladu ffrwd o babïau wedi’u gwau a’u crosio a fydd yn addurno Eglwys San Ffraid er coffa. Hoffwn ddiolch i bawb sy’n cymryd rhan yn y cynllun cymunedol hwn, a fydd rwy’n gwybod yn cynnig ennyd lonydd i rywun aros a chofio’r rhai sydd wedi gwasanaethu.
“Gydag arogl coffi yn yr awyr, roedd hi’n gyffrous iawn gweld y criwiau cymdeithasol a chyfeillgar hyn yn ailgwrdd, gyda’r cyfarfodydd wedi’u trefnu gyda diogelwch Covid mewn cof. Gwn eu bod yn cynnig sicrwydd braf ac amgylchedd diogel i fwynhau hobïau i gymaint o’m hetholwyr.
“A ninnau eisoes yn y Chweched Senedd, rwyf wedi erfyn ar Lywodraeth Cymru i egluro sut y cefnogir mynediad at grwpiau cymorth cymdeithasol, er mwyn i ni gael gweld y cyfarfodydd wyneb yn wyneb hyn yn ailafael ynddi. Mae gormod o breswylwyr hŷn yn cael eu hynysu oherwydd y newid a fu i gynnal digwyddiadau grwpiau yn ddigidol, felly mae’n hollbwysig bod y grwpiau hyn yn cael y cymorth sydd ei angen arnynt i ddychwelyd a ffynnu.”
DIWEDD
Ffoto: Janet Finch-Saunders AS yn y Digwyddiad Coffi Cymunedol a’r paratoadau ar gyfer y casgliad o babïau wedi’u gwau.
