Mewn llythyrau at brif swyddfeydd archfarchnadoedd a siopau, mae Janet Finch-Saunders AS – yr Aelod o’r Senedd dros Aberconwy a Gweinidog Newid Hinsawdd yr Wrthblaid – wedi erfyn ar fusnesau i arddel safbwynt arweinyddiaeth ddinasgar, ecogyfeillgar ac ymrwymo i roi’r gorau i werthu barbeciws untro yn ystod tymor yr haf y flwyddyn nesaf.
Mae Mrs Finch-Saunders AS wedi ysgrifennu at swyddfeydd ASDA, Tesco, Sainsbury’s, Morrison’s, ALDI, Lidl, SPAR, B&M, Home Bargains, Wilko, Poundland a Poundstretcher.
Yn gynt yn yr haf, galwyd Gwasanaeth Tân ac Achub Gogledd Cymru i dri digwyddiad gwahanol wedi eu hachosi gan farbeciws untro ar un diwrnod yn unig. Mewn datganiad, dywedwyd yn glir bod y tri achos wedi digwydd ar ôl i bobl fethu â chael gwared â’u barbeciws yn ddiogel.
Wrth roi sylwadau ar ei llythyrau, dywedodd Janet:
“Mae barbeciws untro yn niwsans modern go iawn sy’n achosi llawer gormod o beryglon i’n hamgylchedd ac i iechyd y cyhoedd. Gan fod y barbeciws ffoil hyn yn gallu cael eu cludo, maent yn aml yn cael eu defnyddio mewn lleoliadau anaddas fel o dan goed neu ger gwair hir, llwyni neu ffensys a all fynd ar dân yn gyflym.
“Mae gwaelod y barbeciw yn gallu mynd yn boeth iawn, a gyda thywydd sych am gyfnodau maith dros yr haf, mae potensial i ddifrodi’r tir. Fel y gwelwyd yn gynt yn yr haf eleni, gallant hefyd achos tanau diangen mewn biniau os ydynt yn cael eu taflu cyn oeri i dymheredd addas.
“Mae angen i fanwerthwyr ystyried y ffaith nad yw’r cynhyrchion hyn yn gallu cael eu hailgylchu, yn enwedig mewn oes lle dylen ni roi blaenoriaeth i’r economi gylchol. Rydw i wedi’u gweld yn cael eu gadael ar ôl dan dywod ble gallent losgi traed. Ni fyddai hyn yn digwydd pe bai cwsmeriaid yn cael eu cyfeirio at farbeciws cludadwy y mae modd eu defnyddio fwy nag unwaith.
“Rwyf wedi ysgrifennu at nifer o fanwerthwyr gwahanol i ofyn iddynt gymryd safbwynt arweinyddiaeth ddinasgar, ecogyfeillgar drwy ymrwymo i roi’r gorau i werthu barbeciws untro yn ystod tymor yr haf y flwyddyn nesaf. Mae’n rhaid gweithredu ar unwaith cyn i benderfyniadau gael eu gwneud am stociau.”
DIWEDD
Nodiadau i Olygyddion:
Ffoto: Janet Finch-Saunders AS
