Mae’r Gogledd wedi profi haf sy’n torri record o ran nifer yr ymwelwyr, meddai cymdeithas dwristiaeth y rhanbarth. Mewn sylwadau a wnaed i’r BBC, dywedodd cadeirydd Twristiaeth Gogledd Cymru, Chris Frost, fod nifer y teithiau dydd ac aros dros nos ar i fyny, gyda phobl yn archebu am gyfnodau hirach nag arfer.
Croesawyd y newyddion gan Janet Finch-Saunders AS, yr Aelod o’r Senedd dros Aberconwy, sydd yr wythnos hon wedi bod ar daith bwyd a diod o amgylch yr etholaeth, gan dynnu sylw at y busnesau unigryw seiliedig ar brofiad sy’n helpu i ddenu ymwelwyr i’r rhanbarth.
Ymhlith y llefydd y bu’n ymweld â nhw roedd gwesty Plas Maenan, caffi Tu Hwnt i’r Bont yn Llanrwst, bwyty Groegaidd White Tower yn Llandudno, a thafarn Tŷ Gwyn yn Ro-wen. Ddoe, cynigiodd yr Aelod lwncdestun i lwyddiant Gwinllan Conwy hefyd.
Wrth groesawu’r cynnydd mewn ymwelwyr, dywedodd Janet:
“Mae’r cynnydd a welwyd yn nifer yr ymwelwyr i’r Gogledd i’w groesawu’n fawr, gan alluogi ein busnesau lletygarwch a thwristiaeth gwych i ddod yn ôl yn gryfach wedi 18 mis heriol iawn, a gobeithio y bydd yn gam cadarnhaol ar gyfer y tymhorau gwyliau i ddod.
“Gogledd Cymru yw gwir gartref gwyliau profiad, gyda fy etholaeth i yn Aberconwy yn cynnig cymysgedd gwych ac unigryw o anturiaethau arfordirol a mynyddig, yn ogystal â chyfleusterau bwyta o ansawdd uchel. Cadarnhawyd hynny gan fy nhaith fwyd a diod ddiweddaraf o gwmpas y rhanbarth, gan ymweld â’n trefi a’n pentrefi.
“Ar ôl cyfarfod rhithwir gyda chynrychiolwyr o’r sectorau lletygarwch a llety'r wythnos diwethaf, roeddwn yn awyddus i brofi eu gwaith aruthrol ar y rheng flaen. Mae’r daith hon wedi dangos yn glir fod ein busnesau lleol yn ymdrechu’n galed, er gwaethaf heriau staffio, i sicrhau bod ymwelwyr a thrigolion yn gallu cael profiad pleserus a chofiadwy.”
DIWEDD
Llun: Janet Finch-Saunders AS/MS a’r Cynghorydd Dan Worsley
