Mae Janet Finch-Saunders Aelod o’r Senedd dros Aberconwy a Gweinidog yr Wrthblaid dros Newid Hinsawdd, wedi galw ar drigolion i ddefnyddio rhif llygredd Cyfoeth Naturiol Cymru (0300 065 3000) ar unwaith os oes unrhyw bryderon am arwyddion o lygredd. Mae'r llinell gymorth ar gael 24 awr, saith diwrnod yr wythnos, gyda swyddogion medrus ar alwad i asesu'r adroddiad llygredd a mynychu os oes angen.
Mae croeso i drigolion ffonio i adrodd am y canlynol:
- difrod neu berygl i'r amgylchedd naturiol
- troseddau bywyd gwyllt sydd eisoes wedi'u cyflawni (dylid rhoi gwybod i'r heddlu am ddigwyddiadau cyfredol drwy ffonio 101)
- difrodi neu ddinistrio clwydi ystlumod
- llygru dŵr neu dir
- potsian neu bysgota anghyfreithlon
- pysgod mewn trallod neu wedi marw
- amau bod coeden wedi'i thorri'n anghyfreithlon
- amau clefyd coed
Mae'r rhestr lawn ar gael trwy glicio yma. Mae modd defnyddio ffurflen gyswllt ddigidol i nodi unrhyw bryderon hefyd. Daw hyn ar ôl i'r AS riportio achos difrifol posib o garthion yn gollwng ar draeth Deganwy, aber Conwy. Mae swyddogion bellach yn ymchwilio i'r mater.
Mewn ymateb, dywedodd Janet:
“Fel y pwysleisiodd adroddiad CCRA3, mae newid hinsawdd yn achosi perygl posib i'r seilwaith diwydiannol, gan gynyddu'r posibilrwydd o lifogydd ar dir halogedig a safleoedd tirlenwi hanesyddol, gan arwain o bosib at achosion o lygredd gwasgaredig. Felly, dylem i gyd gadw llygad barcud am unrhyw achos a allai ddifetha'r amgylchedd.
“Felly, rwy'n annog preswylwyr i ddefnyddio llinell gymorth digwyddiadau CNC, a sicrhau eich bod yn rhoi cyfeirnod grid neu gyfarwyddiadau mor fanwl â phosib i swyddogion. Rhaid i'n hymateb i'r bygythiad posib gael ei lywio gan dystiolaeth a data, felly mae'n ddyletswydd arnom fel dinasyddion cyfrifol a gwarcheidwaid y tir.
“Ar ôl riportio digwyddiad fy hun yn gynharach yr wythnos hon, mae'r ffaith fod swyddogion medrus yn ymchwilio i arferion niweidiol posib yn rhoi tawelwch meddwl i rywun. Yn y misoedd i ddod, byddaf yn adolygu sut y gallwn sicrhau bod y broses adrodd a riportio yn rhan fwy naturiol o'r oes fodern."
DIWEDD
Llun: Janet Finch-Saunders AS
