Mae'r Aelod o Senedd Cymru dros Aberconwy – Janet Finch-Saunders AS – wedi mynegi siom ynghylch ateb Llywodraeth Cymru i'w hymgyrch dros wella cyfleoedd chwarae i blant yng Nghymru.
Mewn ymateb i gais ynghylch a yw Llywodraeth Cymru wedi ystyried creu dyletswydd statudol i awdurdodau lleol ddarparu a chynnal a chadw meysydd chwarae i blant, dywedodd y Dirprwy Weinidog Gwasanaethau Cymdeithasol:
“Rydym yn parhau i adolygu'r gofynion statudol presennol, ac nid ydym yn credu bod angen dyletswydd benodol mewn perthynas â meysydd chwarae ar hyn o bryd.
Wrth siarad am yr ymateb, dywedodd Janet:
“Ar ôl gweithio yn fy etholaeth i adfer a chynnal parciau chwarae lleol, gan gynnwys cydweithio â'r gymuned yn Llanrwst, rwyf wedi gweld â’m llygaid fy hun sut y gellid gwella'r ddarpariaeth drwy gyflwyno dyletswydd statudol benodol i awdurdodau lleol gynnal a chadw'r cyfleusterau hyn.
“Maen nhw'n gyfleusterau hanfodol ar gyfer iechyd a lles ein plant, gan helpu i feithrin y genhedlaeth nesaf yn ddinasyddion cyflawn a hapus. Maen nhw o fudd i rieni hefyd, fel man cyfarfod i rannu syniadau a gwneud trefniadau cymdeithasol.
“Gan gydnabod bod pandemig y Coronafeirws wedi rhoi straen aruthrol ar gyllidebau llywodraeth ganolog a llywodraeth leol ledled Cymru, byddai cyflwyno dyletswydd statudol o'r fath yn awr yn sicrhau y gallwn osgoi gostyngiad sylweddol mewn gwasanaethau chwarae. Mae'n fater o edrych ar bethau trwy lygaid hirdymor.
“Yn yr un modd, drwy ymgorffori Confensiwn y Cenhedloedd Unedig yn well, byddai rheoliadau Cymru yn cydnabod bod sawl math gwahanol o anabledd neu anghenion arbennig. Byddai’n creu dyletswydd ar dimau Datblygu Chwarae hefyd i weithio'n agos gyda Gwasanaethau Anabledd neu weithgorau awdurdod sy'n asesu'r gwaith o ailgynllunio mannau chwarae newydd a phresennol i sicrhau hygyrchedd."
DIWEDD
Nodiadau i Olygyddion:
- WQ82630: A wnaiff y Gweinidog ddatgan pa ystyriaeth y mae Llywodraeth Cymru wedi'i rhoi i greu dyletswydd statudol ar awdurdodau lleol i ddarparu a chynnal meysydd chwarae plant?
- Atebwyd gan y Dirprwy Weinidog dros Wasanaethau Cymdeithasol: O dan adran 11 o Fesur Plant a Theuluoedd (Cymru) 2010, rhaid i bob awdurdod lleol sicrhau digon o gyfleoedd chwarae yn ei ardal i blant gan roi sylw i'r asesiad digonolrwydd tair blynedd y mae'n rhaid iddo ei gynnal. Mae Polisi Cynllunio Cymru yn nodi gofyniad clir hefyd y dylid darparu mannau hamdden a mannau chwarae. Rydym yn adolygu'r gofynion statudol presennol yn gyson, ac nid ydym yn credu bod angen dyletswydd benodol mewn perthynas â meysydd chwarae ar hyn o bryd. Mae eu darpariaeth a'r gwaith o’u cynnal a’u cadw’n rhan o'r ddyletswydd ehangach ar awdurdodau lleol i asesu a sicrhau digon o gyfleoedd chwarae.
