Mae profiadau pobl hŷn yn ystod pandemig Covid-19 wedi cryfhau'r achos dros ddiogelu eu hawliau ymhellach yn y gyfraith, meddai’r Aelod o Senedd Cymru dros Aberconwy yn y Senedd heddiw. Fel ymgyrchydd hirdymor dros gyflwyno Bil Hawliau Pobl Hŷn, mae Janet Finch-Saunders AS wedi galw ar Lywodraeth Cymru i adeiladu ar fomentwm y gefnogaeth a welwyd dros y flwyddyn ddiwethaf drwy gyflwyno dyletswydd ar Weinidogion Cymru i roi sylw dyledus i Egwyddorion y Cenhedloedd Unedig ar gyfer Pobl Hŷn.
Daeth ymyriad diweddaraf Janet fel rhan o ddadl ar Gynnig Deddfwriaethol Aelod, dan arweiniad yr Aelod dros Ddyffryn Clwyd Gareth Davies AS. Erbyn 2035, bydd Cymru'n brin o 7,000 o welyau gofal nyrsio a 15,000 o unedau tai i bobl hŷn. Hefyd, amcangyfrifir y gallai tua 140,000 o bobl hŷn yng Nghymru fod yn dioddef rhyw fath o gamdriniaeth.
Wrth siarad ar ôl y ddadl, dywedodd Janet:
“Mae'n amlwg o'r adroddiad diweddar, Gwasanaethau Cymorth i Bobl Hŷn sy'n Profi Camdriniaeth yng Nghymru, fod angen cymryd mwy o gamau. Yn wir, roedd yr adroddiad yn argymell y dylai Llywodraeth Cymru adolygu strategaethau a pholisïau perthnasol i sicrhau eu bod yn mynd i'r afael ag anghenion pobl hŷn.
“Yr hyn sy’n bwysig i etholaeth fel Aberconwy yw bod yr adroddiad yn egluro hefyd yr angen i lunwyr polisi, comisiynwyr a darparwyr gwasanaethau ystyried sut y gellir diwallu anghenion pobl hŷn sy'n byw mewn ardaloedd gwledig.
“Gallwn helpu drwy greu'r ddyletswydd i roi sylw dyledus i Egwyddor y Cenhedloedd Unedig y dylai pobl allu byw mewn amgylchedd diogel. Dychmygwch y gwahaniaeth pe bai'n rhaid i'r rhai sy'n gwneud penderfyniadau roi sylw dyledus i'r angen i bobl hŷn gael mynediad at ofal iechyd a thai digonol.
“Mae Egwyddorion y Cenhedloedd Unedig yn ddefnyddiol ond dydyn nhw ddim yn golygu llawer i bobl hŷn yng Nghymru am nad oes ganddynt berchnogaeth arnynt. Dyna pam rwy'n falch o gefnogi'r cynnig hwn, a gyflwynwyd gan Gareth Davies AS, fel bod pobl fwyaf agored i niwed cymdeithas yn cael eu trin â'r urddas a'r parch maen nhw'n ei haeddu."
DIWEDD
Llun: gan Micheile Henderson ar Unsplash
