Heddiw (23 Mehefin), cafodd Janet Finch-Saunders AS - Aelod o’r Senedd Aberconwy – ei hethol yn Gomisiynydd grŵp y Ceidwadwyr Cymreig ar gyfer y Chweched Senedd, yn dilyn pleidlais gan yr holl Aelodau. Mae’n ofyniad cyfreithiol ar y Senedd i benodi Comisiynwyr sy’n gyfrifol am ddarparu’r staff a’r adnoddau sydd eu hangen ar y Senedd i gyflawni eu rolau yn effeithiol ar gyfer pobl Cymru.
Gan roi sylwadau ar ei henwebiad, dywedodd Janet:
“Rwy’n falch iawn o gael fy ethol gan fy nghydweithwyr yn y Senedd, o bob plaid, i fod yn Gomisiynydd ar ran y Ceidwadwyr Cymreig ar gyfer y Chweched Senedd. Mae’r Comisiwn yn gwneud gwaith hollbwysig, gan sicrhau bod y sefydliad democrataidd hanfodol hwn yn cael ei redeg yn effeithiol ac yn effeithlon.
“Mae heriau anhygoel y flwyddyn ddiwethaf wedi hoelio ein sylw o’r newydd ar waith Comisiwn y Senedd, ac rwy’n edrych ymlaen at sicrhau mwy fyth o dryloywder. Byddaf hefyd yn mynd ati i sicrhau bod yr arian sy’n cael ei wario mewn ffordd briodol a darbodus, yn unol â disgwyliadau pobl Cymru.
“Rwy’n edrych ymlaen nawr at gychwyn ar y gwaith, yn enwedig gan fod y Senedd yn dechrau ar y broses o groesawu ymweliadau gan y cyhoedd unwaith eto ar ôl cyfnod hirfaith o gau ei drysau yn sgil y pandemig Coronafeirws.”
DIWEDD
Nodiadau i Olygyddion:
- Mae’r Comisiwn yn cael ei gadeirio gan y Llywydd, ac yn cynnwys Aelodau sydd wedi’u hethol gan y Senedd. Mae gan bob aelod o’r Comisiwn bortffolio penodol o gyfrifoldebau ar gyfer y Chweched Senedd.
Ffoto: Janet Finch-Saunders AS
