O’r wythnos hon ymlaen, bydd cleifion ledled etholaeth Aberconwy yn gallu ffonio 111 i gael mynediad am ddim at ofal meddygol y tu allan i oriau brys a chymorth ac arweiniad iechyd ddydd a nos. Mae’n rhif hawdd i’w gofio ac am ddim o linellau tir a ffonau symudol a bydd yn helpu cleifion i gael y wybodaeth, yr arweiniad a’r driniaeth iawn yn y lle iawn ar yr amser iawn.
Mae’r gwasanaeth, a lansiwyd ddechrau’r wythnos, wedi cael croeso cynnes gan Janet Finch-Saunders AS - Aelod o’r Senedd Aberconwy - sydd wedi bod yn ymgyrchu am fynediad cyfartal at y gwasanaeth. Mae GIG 111 Cymru yn cael ei staffio gan dîm mawr o nyrsys, meddygon a fferyllwyr, ynghyd â dwsinau o atebwyr galwadau newydd wedi’u hyfforddi.
Wrth groesawu’r newyddion, dywedodd Janet:
“Gydol y pandemig, ac yn sgil yr annog cyson i bobl ddefnyddio’r gwasanaeth ffôn, derbyniais gwynion diri gan etholwyr dryslyd a oedd yn cael eu cyfeirio at y gwasanaeth GIG 111 dim ond i weld nad oedd y gwasanaeth cyngor meddygol i achosion nad oedden nhw’n rhai brys ar gael ar gyfer ardal y Gogledd.
“Dyna pam y gwnes i annog Gweinidog Iechyd Cymru i sicrhau mynediad cyfartal at y cymorth meddygol hwn. Yn wir, roedd hi’n dipyn o sioc fod fy etholwyr wedi bod yn gorfod talu cyhyd am alwadau i Galw Iechyd Cymru i gael cyngor meddygol ar gyfer achosion nad oedden nhw’n rhai brys, o gymharu â mannau eraill.
“Rwyf wrth fy modd bod y gwasanaeth wedi’i lansio bellach gan fod llawer o fy mhreswylwyr mwyaf bregus yn awyddus iawn i ddefnyddio’r cynllun cymorth ffôn er mwyn ysgafnhau’r pwysau ar y rhif cyswllt mewn argyfwng. Byddaf bellach yn ceisio sicrhau mai dyma’r rhan gyntaf o don newydd o fuddsoddiad yn ein Bwrdd Iechyd er mwyn gallu dechrau mynd i’r afael â’r argyfwng rhestr aros yn y rhanbarth.”
DIWEDD
Nodiadau i Olygyddion:
- Mae’r gwasanaeth 111 yn cael ei weithredu gan Ymddiriedolaeth GIG Gwasanaethau Ambiwlans Cymru o ganolfannau ledled Cymru, gan gynnwys canolfan fawr yn Llanelwy. Gellir cael cyngor meddygol ar wefan GIG 111 Cymru.
Ffoto: Janet Finch-Saunders AS
