Mae Janet Finch-Saunders AS – Yr Aelod o Senedd Cymru dros Aberconwy a Gweinidog yr Wrthblaid dros y Newid yn yr Hinsawdd – wedi cyhoeddi sesiwn glanhau’r traeth yr haf hwn yn Llandudno, mewn cydweithrediad â'r Gymdeithas Cadwraeth Forol. Cynhelir y digwyddiad, sydd wedi'i drefnu yn unol â chanllawiau Covid llywodraeth leol a chenedlaethol, ddydd Gwener 2 Gorffennaf 2021, rhwng 11:30 a.m a 12:30 p.m. Bydd y grŵp yn cyfarfod wrth y Senotaff gyferbyn â Thraeth y Gogledd Llandudno ac yn cadw pellter cymdeithasol.
Wrth agor y mannau sy'n weddill i'r cyhoedd, dywedodd Janet:
"Mae gan ein cymuned hanes balch o helpu’n gilydd. Mae llawer o'n heconomi yn Llandudno yn dibynnu ar lwyddiant y diwydiant twristiaeth a hynny’n rhannol seiliedig ar ymdrechion ein cyngor, ein gwirfoddolwyr a’n gwestywyr i gadw ein mannau cyhoeddus i edrych ar eu gorau.
"Dyma pam rwy'n falch o gynnig y lleoedd sy'n weddill ar fy sesiynau glanhau traethau i aelodau o'r cyhoedd sydd â diddordeb. Drwy weithio gyda'n gilydd, bydd y gwaith o lanhau’r traeth yr haf hwn yn gam i'r cyfeiriad cywir wrth i ni barhau i weithio i ddiogelu ein cynefinoedd arfordirol.
"Yn ôl y Gymdeithas Cadwraeth Forol, mae llygredd plastig yn parhau i fod yn un o bum prif sbardun yr argyfwng bioamrywiaeth presennol. Un o’r ffeithiau mwyaf brawychus yw y gall y sbwriel hwn beri difodiant tua 40% o famaliaid môr. Fel hyrwyddwr y boblogaeth leol o lamhidyddion, byddaf yn parhau i weithio i ddileu’r perygl hwn."
Diwedd
Llun: Janet Finch-Saunders AS a'i thîm, yn ogystal â Clare Trotman o'r Gymdeithas Cadwraeth Forol, yn ystod Sesiwn Casglu Sbwriel Medi 2020.
