Cam hynod ffodus i fyd gwneud siocled roddodd fywyd newydd i siop siocledi Maisie’s yn Llandudno, meddai Tim Winstanley wrth Janet Finch-Saunders AS ar ei hymweliad diweddar â’r siop. Cymerodd y teulu Winstanley yr awenau ym Maisie’s yn 2019 ac ar ôl cyfnod yn treialu diodydd swigod cartref, daeth ysbrydoliaeth fel afon o siocled dros y teulu wrth iddynt fentro i’r farchnad diodydd poeth arbennig dan label Pendragon Drinks.
Daeth yr ymweliad diogel o ran Covid ar ôl i Tim orfod trawsnewid y llawr gwaelod i gyd yn Llandudno Chocolate Experience yn safle cynhyrchu dros dro i weithio ar y nifer cynyddol o archebion dros y flwyddyn ddiwethaf, gyda llawer o waith caled yn ddiweddar ar ôl derbyn archeb fawr iawn am drowyr siocled ar gyfer marchnad lletygarwch Sweden.
Mae’r gwaith wedi dechrau ar ehangu i eiddo cyfagos lle bydd y gwaith cynhyrchu yn cael ei wneud, gyda chymorth ei rieni, Karen a Richard. Wrth groesawu’r newyddion am yr ehangu, dywedodd Janet:
“Mae’r newyddion bod Tim yn gobeithio ehangu safle cynhyrchu’r busnes lleol a theuluol hwn, yn ogystal â dechrau creu peiriannau newydd i wneud gwahanol fathau o siocled, yn dangos ei ymroddiad a’i ddyfeisgarwch. Pob llwyddiant i’r teulu Winstanley!
“Trwy hybu elfen gynhyrchu eu busnes siocled sy’n tyfu, ac allforio’r cynhyrchion moethus Cymreig hyn i farchnadoedd fel Sweden, mae’r teulu Winstanley’n chwa o awyr iach yng nghanol hanesion trist am ein heconomi.
“Maen nhw’n un o drysorau Llandudno, gyda’u harlwy mor boblogaidd nes bod nifer o gwsmeriaid wedi crybwyll eu bod yn teithio i Landudno yn bennaf i ymweld â Maisie’s. Yn wir, mae pobl wedi dod o lefydd mor bell â Beverley, yn Swydd Efrog i brynu’r danteithion hyfryd hyn.”
Mae Maisie's Chocolate Shop yn gwerthu siocled detholiad amrywiol o siocledi moethus a gynhyrchir yn fewnol a rhai allanol sydd ar gael i’w prynu ar-lein. Cyn y pandemig, gallai pobl ymweld a blasu samplau wrth gerdded o gwmpas yr amgueddfa. Mae The Llandudno Chocolate Experince yn daith dywysedig ystafell dywyll drwy hanes siocled dros 5000 o flynyddoedd gyda phethau anghyffredin oedd yn gysylltiedig â gwneud siocled y mae’r teulu wedi cael gafael arnynt o bedwar ban byd, gan gynnwys bar o siocled sydd wedi bod gyda milwyr yn Rhyfeloedd Boer yn Ne Affrica.
Roedd y daith yn rhan o daith fusnes ddiweddaraf Janet o gwmpas Llandudno wrth iddi geisio cefnogi a dathlu doniau entrepreneuraidd lleol wrth i’r rhanbarth ddod dros y pandemig Covid-19.
DIWEDD
Nodiadau i Olygyddion:
- Mae Maisie's Chocolate Shop wedi’i lleoli yn 25 Stryd Vaughan, Llandudno LL30 1AH. Gellir archebu cynhyrchion ar-lein yn www.maisies.co. Mae The Llandudno Chocolate Experience dros y ffordd yn John Street Cocoa Works, Llandudno LL30 2AB. Am ragor o wybodaeth, ewch i www.llandudnochocolateexperience.co.uk
Llun: Janet Finch-Saunders AS gyda Tim a Karen Winstanley.
