Cyn cyhoeddiad gan Lywodraeth Cymru heddiw, mae Janet Finch-Saunders, yr Aelod o'r Senedd dros Aberconwy, unwaith eto wedi annog y Prif Weinidog i roi manylion y map ffordd ar gyfer adferiad, i gynnwys "amlinelliad o'r cyfleoedd i fusnesau yn y sectorau manwerthu, lletygarwch, hamdden a thwristiaeth.”
Gan bwysleisio'n glir yr angen am fap ffordd, dywedodd Janet:
“Mae fy etholwyr wedi datgan yn glir eu dymuniad am gynllun manwl ar gyfer teuluoedd, gweithwyr a busnesau ledled Cymru. Fel blaenoriaeth, dylai'r map ffordd hwn ar gyfer adferiad gynnwys amlinelliad o gyfleoedd hollbwysig i fusnesau yn y sectorau manwerthu, lletygarwch, hamdden a thwristiaeth. Y sectorau hyn yw calon ac enaid Gogledd Cymru.
“Fel y nodwyd yn gwbl glir yn fy fforymau busnes rhithwir dros y ddeufis diwethaf, mae ein entrepreneuriaid am gael eu grymuso i fasnachu ac maent yn dymuno'n fawr y bydd Aberconwy yn dychwelyd yn gryfach. Mae angen arian ar ein busnesau i ailgychwyn yn hytrach nag ailddatblygu – gwahaniaeth hollbwysig.
“Dyma pam y mae angen pecynnau cymorth arnom ar frys er mwyn ailgychwyn yr economi, fel Grant Ailgychwyn newydd i Gymru, wrth i'r bobl sy'n creu swyddi geisio pontio ymhellach drwy'r cyfnod hwn. Mae'n rhaid i'r gwaith hwn gychwyn nawr.”
Diwedd
Llun: Mike Petrucci ar Unsplash
