Mae Janet Finch-Saunders AS – Aelod o’r Senedd dros Aberconwy a Gweinidog yr Wrthblaid y Ceidwadwyr Cymreig dros Newid yn yr Hinsawdd, Ynni a Materion Gwledig – wedi croesawu aelodau lleol y Cerddwyr yng Nghymru i gyfarfod (gan gadw pellter cymdeithasol) er mwyn cyflwyno eu maniffesto ar gyfer 2021, Wales for Walking - the routes to recovery.
Wrth sôn am y cyfarfod, meddai Janet:
“Oherwydd y cyfyngiadau diweddar yn sgil y Coronafeirws, mae llawer o drigolion lleol wedi dechrau gwerthfawrogi o'r newydd y manteision y mae cerdded yn eu cynnig i'w hiechyd a'u lles. Yn bersonol, rydw i wedi dechrau cerdded Llychlynnaidd dros y misoedd diwethaf, sydd wedi fy helpu i adfer cysylltiad â'r llwybrau a mannau gwyrdd gwych sydd i'w gweld ar garreg ein drws.
“Hoffwn ddiolch i'r Cerddwyr yng Nghymru ac aelodau o'u cangen leol yn y gogledd a ddaeth i'm swyddfa etholaethol i gyflwyno’r maniffesto, gan gadw pellter cymdeithasol. Mae hon yn ddogfen bwysig sy'n galw am ddiogelu mannau gwyrdd sy'n gwneud ein cymunedau'n llefydd iach i fyw, gweithio a gwirfoddoli ynddynt. Edrychaf ymlaen at ddarllen y ddogfen eto yn llawn.
“Rydw i hefyd yn falch o glywed ei fod yn ategu fy ngalwadau i i sicrhau bod cerddwyr ein cenedl yn deall yn well sut i ddiogelu a pharchu ein mannau gwyrdd. Er bod gennym reolau sydd wedi'u sefydlu ers bron i gan mlynedd, mae'n gwbl glir nad yw gwybodaeth y cyhoedd am y cyfrifoldebau gwledig hyn wedi parhau.
“Dyna pam rydw i wedi galw dro ar ôl tro ar Lywodraeth Cymru i ymchwilio i sut gallwn addysgu'r cyhoedd yn well ar faterion y Cod Cefn Gwlad. Yn y byd sydd ohoni, mae llawer o ffyrdd gwahanol y gall Gweinidogion eu defnyddio i'n grymuso i gyd i ddysgu sut i ymddwyn yn ddiogel ac yn gyfrifol yn ardaloedd gwledig Cymru.
“Rwy'n annog fy holl drigolion lleol i gymryd rhan yn yr heriau sy'n ymwneud â cherdded y mae sefydliad y Cerddwyr wedi bod yn ddigon caredig i'w llunio er mwyn helpu i gymell pobl i fynd allan ac archwilio. Dim ond drwy fynd allan a chysylltu â natur y cawn ein hatgoffa go iawn o'i bwysigrwydd i'n hiechyd a'n ffyniant yn y dyfodol.”
DIWEDD
Llun: Janet Finch-Saunders AS yn cyfarfod aelodau cangen ardal Gogledd Cymru y Cerddwyr.
