Heddiw (10 Tachwedd), mae Janet Finch-Saunders AS - Aelod o’r Senedd dros Aberconwy - wedi erfyn ar Lywodraeth Cymru i roi diweddariadau rheolaidd ar sut mae Busnes Cymru yn ymdopi â’i gyfrifoldebau am gynllun grant y Coronafeirws, yn sgil cwynion gan etholwyr am gyngor dryslyd ac amseroedd aros hirach wrth ddefnyddio’r llinell gymorth.
Gan roi sylwadau ar y mater hwn, yn dilyn ei chyfraniad yn y Senedd heddiw, dywedodd Janet:
“Rwy’n bryderus iawn am y pwysau y mae Llywodraeth Cymru yn ei roi ar Busnes Cymru. Mae’r straen ar y sefydliad hwn yn arwain at gamgymeriadau na ellir eu hosgoi, gan arwain at ddryswch mawr a rhwystredigaeth yn ystod cyfnod o heriau enfawr eisoes i’n busnesau.
“Dyw hwn ddim yn fater newydd, chwaith. Y mis diwethaf, yn sgil sesiwn y Pwyllgor Craffu ar y Prif Weinidog, crybwyllais y ffaith nad oedd gwefan Busnes Cymru wastad yn darparu gwybodaeth gywir e.e. doedd y testun i’r cyhoedd ddim yn cael ei ddiweddaru law yn llaw â chyhoeddiad cyhoeddus.
“Ond tra bod y Prif Weinidog yn croesawu’r adborth, mae angen mawr o hyd am welliannau. Yn wir, mae gen i etholwyr sydd wedi clywed bod gofyn iddyn nhw ddarparu gwybodaeth ychwanegol i Busnes Cymru ond sydd heb gael cyfarwyddyd ar sut i’w darparu. Mae hyn yn peri gofid mawr o ystyried ein bod wedi’n hysbysu y bydd grantiau’n cael eu darparu ar sail y cyntaf i’r felin.
“Mae eraill yn cwyno am amseroedd aros hir dros ben wrth ffonio’r llinell gyngor, gydag un aelod o’m tîm i wedi gorfod aros am awr a deg munud cyn colli cysylltiad am 5pm. Mae’n gyfnod pan na all llawer o’m busnesau lleol fforddio gwastraffu’r fath amser ar y ffôn.
“O ystyried y cyfrifoldeb mawr ar ysgwyddau’r asiantaeth hon ar hyn o bryd, rwy’n credu’n gryf y gall y tîm fod wedi eu llethu dan y pwysau. Felly credaf y dylai Senedd Cymru gael diweddariadau rheolaidd ar sut mae’r sefydliad yn rheoli’r cyfrifoldeb cymorth busnes enfawr hwn.
DIWEDD
Ffoto: Michael Longmire ar Unsplash
