Heddiw (14 Hydref), mae Janet Finch-Saunders AS – wedi defnyddio dadl y Ceidwadwyr Cymreig yn y Senedd i erfyn ar Lywodraeth Cymru i adolygu’r Gronfa i Fusnesau dan y Cyfyngiadau Lleol, wrth iddi siarad am ei phryder am les meddyliol entrepreneuriaid lleol.
Anogodd Mrs Finch-Saunders Lywodraeth Cymru hefyd i ailystyried ei hymagwedd at y cyfyngiadau, gan alw ar y weinyddiaeth i gyhoeddi data’n rheolaidd ar sail wardiau awdurdodau lleol. Gosodwyd cyfyngiadau coronafeirws lleol iawn yn ddiweddar ym Mangor a Llanelli, tra bod mesurau drwy’r sir ar waith yng Nghonwy.
Gan roi sylwadau ar ei haraith, dywedodd Janet:
“Bron i bythefnos ers lansio’r cyfyngiadau lleol yn sir Conwy ac rwy’n gofyn ar Lywodraeth Cymru i feddwl am yr effaith negyddol ar iechyd meddwl yn yr hirdymor y mae’r cyfyngiadau presennol yn eu cael ar berchnogion busnes lleol sy’n brwydro i fodoli ar hyn o bryd.
“Mae angen cymorth ariannol ar unwaith tra bod y cyfyngiadau’n parhau yng Nghonwy. Dydy Grant y Gronfa i Fusnesau dan Gyfyngiadau Lleol, sydd eisoes yn hwyr, ddim yn ddigon. Mae swyddi a bywoliaethau yn y fantol, a amlygwyd gan dystiolaeth yr adroddiad diweddar ar ganol trefi, a ddatgelodd fod 40.9% o weithwyr Llandudno mewn sectorau sydd wedi gorfod cau.
“Mae rheol 21 diwrnod y Gronfa i Fusnesau dan Gyfyngiadau Lleol yn profi nad yw’r weinyddiaeth hon yn gwybod beth yw realiti’r sefyllfa. Mae gadael i’r gronfa hon weithredu ar sail y cyntaf i’r felin hefyd yn ei gwneud yn rhyw fath o ras. Mae’n sarhaus ar bob busnes sydd wedi’u heffeithio.
“Rwyf wedi erfyn yn gyson am ddull hyperleol a fyddai’n tarfu llai. Sut ydym wedi cyrraedd y pwynt hwn lle mae Llywodraeth Cymru yn cadw data lleol ar gyfer Bangor, Pen-y-bont ar Ogwr, Llanelli, Merthyr Tudful a Rhondda Cynon Taf, ond ddim ar Sir Conwy?
“Alla’i ddim gweld cyfiawnhad i Lywodraeth Cymru beidio â chyhoeddi data’n gyson ar nifer y profion positif ar sail wardiau awdurdodau lleol. Mae cymunedau lleol yn haeddu gwybod a oes cofnod o COVID-19 yn y pentref, yn hytrach na gweithredu ar sail Conwy gyfan.”
DIWEDD
