Mae Janet Finch-Saunders AS - Gweinidog Newid Hinsawdd, Ynni a Materion Gwledig yr Wrthblaid y Ceidwadwyr Cymreig - wedi croesawu’r newyddion y bydd nifer y dynodiadau daearyddol ar gyfer cynnyrch Cymru yn cynyddu dan y cytundeb masnach newydd rhwng y DU a Japan.
Mae cig oen Cymru, cregyn gleision Conwy a halen môr Môn ymysg y 15 o gynhyrchion eiconig o Gymru a allai gael eu diogelu yn Japan am y tro cyntaf fel rhan o gytundeb masnach newydd rhwng y DU a Japan. Cytunwyd ar Gytundeb Partneriaeth Economaidd Cynhwysfawr rhwng y DU a Japan mewn egwyddor gan Liz Truss, yr Ysgrifennydd Masnach Rhyngwladol a Gweinidog Tramor Japan fel rhan o alwad fideo ddydd Gwener 11 Medi 2020. Dyma’r cytundeb masnach fawr gyntaf i’r DU y tu allan i’r UE.
Gan roi ei sylwadau ar y cytundeb masnach, dywedodd Janet:
“Mae’r cytundeb arloesol hwn yn gam anferth ymlaen o safbwynt cysylltiadau DU-Japan ac yn sicrhau manteision ychwanegol i Gymru y tu hwnt i’r cytundeb masnach presennol rhwng y ddwy wlad, gan gynnwys cynyddu nifer y dynodiadau daearyddol fel ffordd o gydnabod cynhyrchion Cymreig eiconig fel cig oen Cymru a gwinoedd rhanbarthol.
“Nid yn unig y bydd y cytundeb newydd yn cryfhau rhagolygon hirdymor y 277 busnes yng Nghymru a allforiodd eu nwyddau i Japan y llynedd, ond hefyd fe fydd yn agor marchnad newydd i’r genhedlaeth nesaf o gynhyrchwyr bwyd a diod yng Nghymru.
“Gyda chyfleoedd i lu o fusnesau newydd werthu eu nwyddau i Japan am y tro cyntaf erioed, bydd y cytundeb newydd hwn yn hwb gwych i entrepreneuriaid newydd ein cenedl. Mae gwledd yn aros trigolion Osaka, wrth iddyn nhw ddechrau cael blas ar gregyn gleision o Gonwy yn sicr!
“Mae’n rhaid i Lywodraeth Cymru bellach fod yn barod i sicrhau y gall ein busnesau fanteisio i’r eithaf ar y cytundeb hwn. Mae hynny’n golygu mireinio’r cynllun Cymorth i Allforio, a gynigir drwy Bwyd a Diod Cymru, er mwyn egluro’n well a hyrwyddo’r cyfleoedd sydd ar gael yn y farchnad Asiaidd bwysig hon.”
DIWEDD
Ffoto: David Greenwood/UnSplash
