Mae asiantau gwerthu hen eiddo G.M. Jones ym Mharc Tŷ Gwyn, Llanrwst, wedi cadarnhau bod cynnig wedi’i wneud ar gyfer y ddwy uned ddiwydiannol. Mae’r newyddion hwn yn dilyn gwaith pwyso gan Janet Finch-Saunders, Aelod Cynulliad dros Aberconwy, ar Lywodraeth Cymru ers i’r cwmni fynd i ddwylo’r gweinyddwyr a’r unedau gael eu gadael yn segur ym mis Mawrth 2019.
Darparodd Llywodraeth Cymru £400,000 i G.M. Jones adeiladu’r unedau pwrpasol yn 2016.
Meddai Janet am y datblygiad:
“Roedd methiant GMJ ym mis Mawrth 2019 yn drychineb mawr i Ddyffryn Conwy.
“Fe gollodd 40 o weithwyr eu swyddi, ac roedd dwy uned fawr a godwyd gyda chymorth arian trethdalwyr gwerth £400,000 bellach yn wag ac yn segur.
“Gan gofio bod Llywodraeth Cymru wedi buddsoddi ein harian ni yn y prosiect, rwyf wedi bod yn defnyddio’r dulliau sydd ar gael yn y Cynulliad i sicrhau bod yr unedau’n cael eu defnyddio eto, ac yn bwysicach, bod mwy o swyddi’n cael eu creu.
“Ar ôl holi Gweinidog yr Economi a Thrafnidiaeth am y sefyllfa yn y Cyfarfod Llawn y mis hwn, rwyf wedi cael cadarnhad ysgrifenedig bod cynnig wedi’i wneud i’r gweinyddwyr am y ddwy uned ddiwydiannol.
“Mae’n ymddangos ein bod gam yn nes at sicrhau hwb cyflogaeth i Lanrwst”.
DIWEDD
Cwestiwn ysgrifenedig yn y Cynulliad gan Janet Finch-Saunders AC:
Ymhellach i’r cyfarfod llawn ar 4 Rhagfyr 2019, a wnaiff y Gweinidog gadarnhau y bydd yn gofyn i Brif Swyddog Rhanbarthol Llywodraeth Cymru yng ngogledd Cymru gysylltu â Busnes Cymru a Chyngor Bwrdeistref Sirol Conwy ynghylch hen adeilad G.M. Jones ym Mharc Tŷ Gwyn, Llanrwst?
Ymateb gan Ken Skates AC, Gweinidog yr Economi a Thrafnidiaeth:
Gallaf gadarnhau bod swyddfa’r Prif Swyddog Rhanbarthol wedi cysylltu â Chyngor Bwrdeistref Sirol Conwy a Busnes Cymru ynglŷn ag adeiladau GMJ yn Llanrwst, a’n bod yn hyrwyddo’r adeiladau ar bob cyfle posibl. Mae’r adeiladau’n cael eu hysbysebu gan Busnes Cymru ac mae asiantau gwerthu’r eiddo wedi cadarnhau bod cynnig wedi’i wneud i’r gweinyddwyr ar gyfer y ddwy uned ddiwydiannol. Byddwn yn parhau i weithio â phawb sydd â diddordeb er mwyn sicrhau cyflogaeth yn y safle yn Llanrwst.
Nodiadau:
Cwestiynau i Weinidog yr Economi a Thrafnidiaeth: Cyllid Grant
Developer given major grant to build £1.3m headquarters has gone into administration
Ffotograff:
Janet Finch-Saunders AC y tu allan i hen adeiladau G.M. Jones yn Llanrwst
