Wrth i ddata newydd ddangos bod nifer y plant sy’n derbyn gofal yng Nghymru wedi cyrraedd y lefel uchaf ers i gofnodion ddechrau yn 2003, mae Janet Finch-Saunders, Aelod Cynulliad Aberconwy, a Gweinidog yr Wrthblaid dros Gofal Cymdeithasol, Plant a Phobl Ifanc, wedi galw am gyllid argyfwng er mwyn helpu awdurdodau lleol lle gellir profi fod straen ariannol ychwanegol wedi achosi’r cynnydd yn nifer a chymhlethdod yr achosion
Roedd 6,845 o blant yn derbyn gofal yng Nghymru ar 31 Mawrth 2019.
Wrth gyfeirio at y lefel uchaf erioed, meddai Janet:
“Mae yna gonsensws trawsbleidiol yn y Senedd bod gennym gyfrifoldeb cyfunol er mwyn sicrhau bod plant sydd wedi bod mewn gofal am ran helaeth o’u hoes yn cael y gofal a’r cymorth gorau sydd ar gael er mwyn gwneud yn siŵr eu bod yn cael yr un cyfleoedd ag unrhyw blentyn arall.
“Mae’r Prif Weinidog wedi tynnu sylw at y nifer cynyddol o blant sy’n derbyn gofal yng Nghymru fel maes blaenoriaeth ar gyfer camau ataliol, ac mae’r Dirprwy Weinidog dros Iechyd a Gofal Cymdeithasol wedi bod yn gweithio ar hyn.
“Mae’r data a gyhoeddwyd yn ddiweddar yn profi nad yw eu strategaeth yn gweithio eto.
“Yn ôl cofnodion, roedd gan awdurdodau lleol ar hyd a lled Cymru'r nifer uchaf o blant sy’n derbyn gofal yn eu gofal ar 31 Mawrth 2019.
“Roedd y nifer yn 6,847 o gymharu â 4,195 ar 31 Mawrth 2003.
“Mae hynny’n 63% yn fwy o blant y mae’n rhaid i awdurdodau lleol ledled Cymru helpu i’w diogelu.
“Er fy mod yn gwerthfawrogi y gallai cynlluniau gostwng disgwyliedig a gytunwyd erbyn mis Mai eleni greu gostyngiad cyfartalog o 4% yn ystod pob un o’r tair blynedd nesaf, ar hyn o bryd mae’r tueddiad yn parhau i’r cyfeiriad arall.
“Ni ellir anwybyddu hyn a dylid sicrhau bod cyllid argyfwng ar gael er mwyn helpu awdurdodau lleol sy’n cael trafferth gyda chostau gofal.
“Er enghraifft, yma yng Nghonwy gwelwyd cynnydd o 23% yn nifer y plant sy’n derbyn gofal ers 2016, a bydd gwasanaethau cymdeithasol wedi gorwario hyd at £2.25 miliwn yn ystod y flwyddyn ariannol.
“Er fy mod yn croesawu’r ffaith bod y gwaith yn cael ei wneud gan yr Awdurdod Lleol er mwyn ceisio darparu gofal mewn modd mwy cost-effeithiol, yn y tymor byr, mae Conwy ac awdurdodau lleol ledled Cymru'n haeddu cymorth ariannol mewn argyfwng lle gellir profi straen ariannol ychwanegol oherwydd cynnydd yn nifer a chymhlethdod yr achosion“.
DIWEDD
Nodiadau:
Plant sy'n Derbyn Gofal ar 31 Mawrth yn ôl awdurdod lleol a math o leoliad
Datganiad gan y Dirprwy Weinidog dros Iechyd a Gwasanaethau Cymdeithasol: Gwella Canlyniadau ar gyfer Plant sy'n Derbyn Gofal (2/7/19)
Cyngor Conwy'n wynebu gorwariant o £2 filiwn yn y sector gwasanaethau cymdeithasol
