Ar ôl blynyddoedd o ymgyrchu cymunedol am groesfan ddiogel i gerddwyr ar hyd yr A470 yng Nglan Conwy, mae Janet Finch-Saunders, yr Aelod Cynulliad dros Aberconwy, wedi cael addewid gan Ken Skates AC, Gweinidog yr Economi a Thrafnidiaeth, y bydd yn gweithredu ar y mater hwn.
Mae ymrwymiad y Gweinidog i’w weld yn ei ymateb i gwestiwn gan Janet, sydd wedi’i gynnwys ar ddiwedd y datganiad hwn i’r wasg.
Wrth drafod ei llwyddiant, meddai Janet:
“Ers i Lywodraeth Cymru gyhoeddi ei chynlluniau i wella Cylchfan y Black Cat, rwyf wedi datgan yn glir bod angen rhoi ystyriaeth fanwl i ddiogelwch cerddwyr yng Nglan Conwy.
“Yn dilyn fy ngwaith craffu ar y gwaith arfaethedig a gweithredoedd y Gweinidog, mae wedi dod i’r amlwg y gallai’r system goleuadau traffig newydd gynyddu’r perygl i ddiogelwch cerddwyr yng Nglan Conwy.
“Felly, i fynd i’r afael â’r mater hwn, rwyf wedi codi’r hen ymgyrch i gael croesfan ddiogel yn y pentref.
“Mae’n dda gennyf ddweud bod Llywodraeth Cymru wedi cytuno o’r diwedd bod angen gweithredu ar y mater hwn.
“Ar ôl gwrando ar fy mhryderon ynglŷn â diogelwch, mae’r Gweinidog yn cynnig uwchraddio’r man croesi presennol yng nghyffordd Stryd yr Eglwys / yr A470 yng Nglan Conwy, gan ddatblygu’r droetffordd bresennol ar ochr y gorllewin i ddarparu llwybr defnydd wedi’i rannu i gysylltu Stryd yr Eglwys â’r cyfleusterau hamdden a’r busnesau yng Nghae Ffwt.
“Gobeithio y bydd cynifer o drigolion â phosibl yn gallu mynychu’r digwyddiad cyhoeddus ynglŷn â’r mater hwn, ar ôl i Lywodraeth Cymru benderfynu ar ddyddiad”.
DIWEDD
Cwestiwn ysgrifenedig Janet yn y Cynulliad:
Yn dilyn WAQ78841 a’r disgwyliad y bydd llif y traffig yn gwella ar hyd yr A470 i gyfeiriad y gogledd trwy Glan Conwy, a oes ystyriaeth wedi’i rhoi i’r perygl cynyddol posibl i gerddwyr sy’n ceisio croesi’r ffordd yn y pentref?
Ymateb Ken Skates AC, Gweinidog yr Economi a Thrafnidiaeth:
Rhoddir ystyriaeth ddyledus i ddiogelwch dulliau trafnidiaeth o bob math, gan gynnwys seiclwyr a cherddwyr, yn ystod cam dichonoldeb a cham dylunio’r cynllun hwn.
Hefyd, rydym yn bwriadu uwchraddio’r man croesi presennol yng nghyffordd Stryd yr Eglwys / yr A470 yng Nglan Conwy. Bydd y gwaith hwn yn cynnwys uwchraddio’r droetffordd bresennol ar ochr y gorllewin i ddarparu llwybr defnydd wedi’i rannu i gysylltu Stryd yr Eglwys â’r cyfleusterau hamdden a’r busnesau ym Mharc Busnes Cae Ffwt.
Mae’r prosiect wedi cyrraedd y cam dylunio manwl, a byddwn yn cynnal digwyddiad cyhoeddus yn y dyfodol agos i ymgysylltu â’r gymuned.
Nodiadau:
A55: cyffordd 19 cyfnewidfa Glan Conwy (trosolwg)
Dogfen Ymgynghori Llywodraeth Cymru: Cyffordd 19 Cyfnewidfa Llansanffraid Glan Conwy Yr A55
Major road improvements planned for notorious A470 Black Cat roundabout off A55
