Mae Janet Finch-Saunders AS - Gweinidog Newid Hinsawdd, Ynni a Materion Gwledig yr Wrthblaid y Ceidwadwyr Cymreig - wedi rhoi ei chefnogaeth i ymgyrch gan RSPCA Cymru, sy’n gofyn i breswylwyr ystyried effaith gweithgareddau noson tân gwyllt ar anifeiliaid anwes a bywyd gwyllt lleol.
Yn y pedair blynedd diwethaf, mae’r RSPCA wedi derbyn 1,543 o alwadau am dân gwyllt a’u heffeithiau ar anifeiliaid. Eleni, yn rhannol yn sgil y cyfyngiadau coronafeirws yng Nghymru a chanslo digwyddiadau ffurfiol sydd wedi’u trefnu, mae pôl piniwn diweddar wedi cadarnhau y bydd 18% yn fwy o bobl yng Nghymru a Lloegr yn cynnal arddangosfeydd preifat yn eu gerddi. Mae’r mudiad yn credu y bydd y nifer cynyddol o arddangosfeydd preifat yn arwain at fwy o alwadau am anifeiliaid a thân gwyllt.
Meddai Janet:
“Rydym yn gwybod erioed bod synau uchel annisgwyl yn gallu peri gofid mawr i dda byw a bod anifeiliaid yn fwy sensitif i sŵn amledd uchel na phobl. Gyda phôl piniwn diweddar yn dangos cynnydd mewn arddangosfeydd tân gwyllt domestig, rwy’n gofyn i breswylwyr feddwl am effaith gweithredoedd fel hyn ar ein hanifeiliaid anwes ac ar ein bywyd gwyllt.
“Mae’r ystadegau sy’n gysylltiedig ag effaith tân gwyllt ar ein hanifeiliaid yn frawychus – mae oddeutu 62% o gŵn yn dangos arwyddion o drallod yn sgil y sŵn, ynghyd â 54% o gathod a 55% o geffylau. Mae bywyd gwyllt, fel draenogod, hefyd mewn perygl o gael eu llosgi’n fyw ar ôl ymgartrefu mewn coelcerth. Mae anifeiliaid fferm yn cael eu dychryn yn hawdd hefyd gan synau uchel a fflachiadau sydyn.
“Mae’r RSPCA yn dweud y dylech osod arddangosfa tân gwyllt yn ofalus er mwyn osgoi cynnau tân gwyllt ger unrhyw grŵp o anifeiliaid gwyllt neu anifeiliaid anwes. Maen nhw hefyd yn erfyn arnoch chi i feddwl am falurion posibl, a all fod yn beryglus i anifeiliaid a tharfu ar dda byw.
“Os ydych chi’n bwriadu cael tân gwyllt preifat, ewch i wefan RSPCA Cymru a bwrwch olwg ar eu tudalennau cyngor ar dân gwyllt. Er budd ein hanifeiliaid anwes a da byw, ac fel gwarcheidwaid ein tir, mae’n rhaid i ni i gyd ystyried ein heffaith ar eu lles.”
DIWEDD
Nodiadau i olygyddion:
- Am ragor o wybodaeth am ymgyrch RSPCA Cymru, cliciwch yma.
Ffoto: Piotr Łaskawski ar Unsplash
