Wrth siarad mewn dadl drawsbleidiol ar wasanaethau bysiau heddiw, mae Janet Finch-Saunders AS - Aelod o’r Senedd Aberconwy - wedi galw ar Lywodraeth Cymru i ymgysylltu’n fwy pwrpasol â’r gymuned leol i ddatblygu eu strategaeth Llwybr Newydd i ddiwallu anghenion cludiant gwledig.
Fel Gweinidog Newid Hinsawdd yr Wrthblaid, mae hefyd wedi galw ar Lywodraeth Cymru i gefnogi “ymgyrch werdd drwy helpu gweithredwyr i fuddsoddi mewn bysiau trydan ac uwchraddio’u seilwaith.” Daw ei hymyrraeth ar adeg lle mae'r defnydd o wasanaethau o’r fath yn gostwng. Awgrymodd dadansoddiad yn 2018 bod y pellter a deithir gan wasanaethau bysiau lleol wedi gostwng o 20% mewn 10 mlynedd. Yn wir, Cymru welodd y gostyngiad canrannol mwyaf mewn milltiroedd bysiau rhwng 2006-2007 a 2016-2017 o gymharu â gwledydd eraill y DU.
Wrth siarad am ei chyfraniad, dywedodd Janet:
“Mae teithio ledled etholaeth Aberconwy yn enghraifft berffaith o sut y gellir moderneiddio gwasanaethau i fodloni galw ledled cymunedau gwledig. Mae gennym wasanaeth bws Fflecsi Dyffryn Conwy. Hefyd, mae Llew Jones International, yn Llanrwst, yn cymryd camau i ddarparu teithio glân, cynaliadwy a fforddiadwy.
“Ond er bod y cytundeb gwasanaethau bysiau £37.2 miliwn yn gam i’r cyfeiriad iawn, rwyf ar ben fy nigon bod consensws rhwng y pleidiau nawr ar yr angen i ymgysylltu’n bwrpasol â chymunedau ledled Cymru ar y strategaeth newydd ac ar lywio gwasanaethau bysiau i ddiwallu anghenion cludiant.
“Fel yr eglurais heddiw, dylai strategaeth Llwybr Newydd Llywodraeth Cymru geisio cefnogi ymgyrch werdd drwy helpu gweithredwyr i fuddsoddi mewn bysiau trydan ac uwchraddio eu seilwaith. Mae’n amser i roi’r strategaeth ar waith, felly rwyf hefyd yn galw am sefydlu amserlenni ar gyfer cyflawni’r ymrwymiadau.
“Gallai cytundebau gwasanaeth bysiau, gyda’r telerau’n ei gwneud yn ofynnol i weithredwyr ddarparu gwasanaethau sy’n diwallu anghenion lleol, fod o fudd i Ddyffryn Conwy a Pharc Cenedlaethol Eryri sy’n gweld cynnydd mewn ymwelwyr yn teithio mewn cerbydau preifat. Ond mae’n rhaid i Lywodraeth Cymru ymgysylltu’n bwrpasol â’r gymuned leol i sicrhau bod Llwybr Newydd yn paratoi’r ffordd.”
DIWEDD
Ffoto: gan Ant Rozetsky ar Unsplash
