Heddiw (14 Hydref), mae Janet Finch-Saunders AS - Aelod o’r Senedd dros Aberconwy - wedi siarad am ei siom ar ôl clywed mai’r cyntaf i’r felin fydd hi o ran ceisiadau, wrth i ragor o fanylion am y Gronfa i Fusnesau dan Gyfyngiadau Lleol Llywodraeth Cymru ddod i’r fei.
Diben y gronfa hon yw cefnogi busnesau gyda chymorth llif arian i’w helpu i oroesi canlyniadau economaidd y cyfyngiadau lleol a roddwyd ar waith yn eu hardal leol. Bydd busnesau yn gymwys i wneud cais am y gronfa hon ar ôl i’w hardal leol fod dan gyfyngiadau am o leiaf 21 diwrnod. Mae busnesau wedi’u hysbysu y bydd yn rhaid iddynt ddangos gostyngiad mewn trosiant o fwy na 40% yn sgil y cyfyngiadau lleol a roddwyd yn sgil Covid-19 i fod yn gymwys am y grantiau hyn.
Gan siarad am y cyhoeddiad, dywedodd Janet:
“Ar ôl aros dros bythefnos am fanylion pellach, siom oedd gweld y bydd y Gronfa i Fusnesau dan Gyfyngiadau Lleol yn cael ei gweithredu ar sail y cyntaf i’r felin, gyda Llywodraeth Cymru yn cyfaddef y gallai hyn arwain at beidio â gwerthuso ceisiadau ar ôl eu cyflwyno os bydd y gronfa wedi’i gwacau.
“Mae’n amlwg nad yw gweinyddiaeth Mark Drakeford wedi dysgu’r un iot o’r camgymeriadau a wnaed yn gynharach eleni, pan wynebodd grantiau lifeiriant o geisiadau ar unwaith a arweiniodd at ddryswch diangen, camgymeriadau a gofid i sawl perchennog busnes yn y Gogledd. Allwn ni ddim caniatáu i hyn ddigwydd eto.
“Ar ôl edrych ymhellach ar y cymorth a gynigir gan y Gronfa i Fusnesau dan Gyfyngiadau Lleol, gyda grantiau o £1,000 i £1,500 yn cael eu cynnig i fusnesau cymwys, mae’n amlwg bod hyn fel newid mân yn unig o gymharu â’r hyn sydd ei angen i atal preswylwyr lleol rhag colli eu bywoliaethau.
“Mae’n rhaid i Weinidog yr Economi adolygu’r penderfyniad i ddeddfu terfyn gwerth ardrethol o £51,000. Wedi’r cwbl, mae gan Landudno nifer o westai a fydd yn cael eu heithrio o’r cymorth ariannol hollbwysig hwn os na fydd y terfyn hwn yn cael ei ddiddymu.
“Llywodraeth Cymru sydd wedi ein llusgo i’r argyfwng economaidd hwn, felly mae angen iddynt fynd ati i gynnig y cymorth ariannol angenrheidiol a fyddai’n galluogi busnesau lleol i oroesi a phontio’r cyfnod hwn.”
“Tra bod Skates wedi bod yn ysgrifennu llythyrau i fusnesau yn erfyn arnynt i helpu i greu iwtopia sosialaidd, mae o wedi colli ei afael ar realiti. Ydy o wir yn credu mai dim ond busnesau sydd wedi bod dan gyfyngiadau lleol am dair wythnos neu fwy sydd angen cymorth ariannol?”
DIWEDD
