Yn dilyn ymgyrch hirsefydlog yr Aelod, yn deisebu Llywodraeth Cymru i gynnal astudiaeth ddichonoldeb i gael ateb amgen a reolir gan oleuadau ar yr A470 ym Mhont Fawr yn Llanrwst, mae Janet Finch-Saunders AS wedi croesawu ymrwymiad gan y Dirprwy Weinidog Newid Hinsawdd y bydd y mater yn cael sylw yng ngweithdy cam 1 WelTAG.
Mae’r gymuned wedi wynebu problemau traffig ar y Bont Fawr sy’n dyddio’n ôl i’r 17eg Ganrif yn Llanrwst ers blynyddoedd. Daw’r ymrwymiad newydd yn sgil llythyr gan yr Aelod o’r Senedd dros Aberconwy. Hefyd, cyflwynodd Janet Gwestiwn Ysgrifenedig ynghylch y pryder. Bydd y trafodaethau y cyfeirir atynt yn cael eu cynnal yn gynnar yn 2022/23.
Yn rhoi sylwadau ar yr ymateb, dywedodd Janet:
“Mae pawb yn gwybod am y trafferthion traffig ar y brif ffordd dros yr Afon Conwy yn Llanrwst. Ar adegau, mae waliau hanesyddol y bont wedi’u taro, mae tagfeydd yn digwydd yn aml wrth geg y bont ac mae defnyddwyr y ffordd yn peryglu eu diogelwch wrth i gerbydau geisio bacio i bob cyfeiriad.
“Fydd hi byth yn sefyllfa ddelfrydol i gael ffordd mor bwysig yn mynd dros bont un lôn ac mae’n rhaid i rywun ymyrryd cyn i rywun gael anaf difrifol. Dyna pam ei bod yn hollbwysig ein bod wedi sicrhau ymrwymiad gan Lywodraeth Cymru i sicrhau y bydd y sefyllfa’n cael sylw yn ystod gweithdy cam 1 WelTAG.
“Ar ôl mynegi pryderon am y gyffordd gyda Phont Fawr; y gyffordd yn Nhal y Cafn; gallt Bodnant; a’r rhan yn ardal Rhyd y Creuau, rwyf wedi fy argyhoeddi bod angen gweithredu mewn sawl man.
“Pan fydd y Senedd yn ailafael yn ei gwaith llawn yn ôl gwyliau’r haf, ac mewn cwestiynau wrth y Dirprwy Weinidog wrth symud ymlaen, byddaf yn ceisio sicrhau bod y mater hwn yn parhau ar frig y rhestr ar gyfer trafodaethau cam 1 WelTAG. Mae’n rhaid i ni ddal yr ymrwymiad hwn i gyfrif os ydym am weld newid.”
DIWEDD
Nodiadau i Olygyddion:
Ffoto: Pont Fawr
