Mae Janet Finch-Saunders, Aelod o’r Senedd Aberconwy, wrth ei bodd â phenderfyniad Pwyllgor Trosolwg a Chraffu ar yr Economi a Lle, Cyngor Bwrdeistref Sirol Conwy, i gefnogi opsiwn amddiffyn yr arfordir ar gyfer Traeth y Gogledd yn Llandudno. Fel rhan o’r opsiwn hwn, bydd tywod yn disodli cerrig chwarel rhwng Cornel y Plant a Stryd Vaughan, ac mae’n bosibl y bydd grwynau pren yn rheoli’r tywod.
Bu bron iawn i’r opsiwn hwn gael ei ddewis yn unfrydol, a dim ond y Cynghorydd Pat Hebron, Llafur Cymru, a oedd yn gwrthwynebu.
Meddai Janet ar ôl y cyfarfod:
“Hoffwn ddiolch i bawb sydd wedi bod yn ymgyrchu i sicrhau bod tywod yn dod yn ôl i Draeth y Gogledd. Mae cynifer ohonom wedi bod yn gweithio i sicrhau hyn ers blynyddoedd.
“Bydd llawer o bobl yn cofio am y cyfarfod cyhoeddus yn Venue Cymru a ddenodd tua 850 o drigolion. Roedd yn amlwg ar y pryd, ac mae’n amlwg heddiw, bod rhaid dod â thywod yn ôl i Draeth y Gogledd.
“Llandudno yw Brenhines cyrchfannau Cymru, ond bu’r broses o ollwng cerrig chwarel ar ein traeth yn ergyd i’w henw da.
“Dyma’r amser perffaith i ni barhau i gydweithio fel cymuned er mwyn adfer y traeth a sicrhau ei fod yn ddiogel i bawb. Mae pawb yn gwybod bod llawer o unigolion wedi brifo eu hunain wrth geisio cerdded dros y cerrig i gyrraedd ymyl y dŵr, a bod eraill wedi penderfynu cadw draw o’r môr oherwydd bygythiad y rhwystr annaturiol hwn.
“Mae ein tref ni yn gyrchfan allweddol i Gymru gyfan, felly rwy’n erfyn ar y Cabinet a’r Cyngor llawn i ddewis opsiwn dau, a byddaf yn parhau i herio Llywodraeth Cymru ar y mater hwn os yw’n dewis peidio â chefnogi’r penderfyniad pwysig hwn gan yr awdurdod lleol”.
DIWEDD
- Opsiwn 2: Mae dewis amgen (tywod) wedi’i nodi hefyd ar gyfer cynnal amddiffynfeydd yr arfordir ar Draeth y Gogledd, Llandudno. Fel rhan o’r opsiwn hwn, bydd tywod yn disodli’r cerrig rhwng Cornel y Plant a Stryd Vaughan, wedi’i reoli â grwynau pren o bosibl. Ar Draeth y Gorllewin, byddai angen cynnal a chadw’r traeth yn rheolaidd ac atgyweirio’r amddiffynfeydd presennol yn unol â pholisi cynllun rheoli’r traethlin. Y gymhareb cost a budd ar gyfer yr opsiwn hwn fyddai 2.06, ac amcangyfrif y gost gyfalaf yw £23,962m.
