Heddiw (14 Hydref), mae Janet Finch-Saunders AS – Eiriolwr dros Bobl Hŷn y Ceidwadwyr Cymreig – wedi adleisio pryderon Age Cymru am absenoldeb cyfeiriadau at bobl hŷn yng nghynlluniau adfer o’r Coronafeirws Llywodraeth Cymru.
Mae Llywodraeth Cymru wedi nodi ei chynlluniau mewn adroddiad a luniwyd gan y Cwnsler Cyffredinol, Ail-greu ar ôl COVID-19: yr heriau a’r blaenoriaethau. Fodd bynnag, mae Age Cymru wedi ysgrifennu at y Prif Weinidog a’r Cwnsler Cyffredinol i fynegi ei syndod nad oedd pobl hŷn yn cael eu crybwyll o gwbl fwy neu lai yn eu cynlluniau i gael Cymru yn ôl ar ei thraed, yn ystod unrhyw gyfnod adfer.
Meddai Janet:
“Mae’n achos pryder mawr na chyfeirir at bobl hŷn yng nghynllun adfer Llywodraeth Cymru ar ôl y pandemig, sy’n dangos cyn lleied y mae Gweinidogion Cymru yn ei feddwl am y rhan bwysig hon o gymdeithas.
“Mae profiadau pobl hŷn yn ystod y pandemig hwn wedi cryfhau’r achos dros ddiogelu eu hawliau ymhellach yn y gyfraith, ynghyd â gwell gwybodaeth a chydnabyddiaeth o’r hawliau hyn. Dyna pam i mi gynnig Bil i gorffori hawliau pobl hŷn Cymru yn ein deddfwrfa yn gynt eleni.
“Mae angen i Lywodraeth Cymru ymgysylltu ar unwaith â’r Comisiynydd Pobl Hŷn, Age Cymru a rhanddeiliaid eraill, i ailystyried eu blaenoriaethau a sicrhau nad yw anghenion pobl hŷn yn cael eu hanwybyddu.
“Gall pobl hŷn gyfrannu’n allweddol at ailadeiladu economi Cymru, felly mae’n rhaid i Lywodraeth Cymru roi grym i’r preswylwyr hyn drwy ail-fagu eu hyder i ail-ymgysylltu a chyfranogi yn eu cymunedau.”
DIWEDD
Ffoto gan Siarhei Plashchynski ar Unsplash
