Mae'r Aelod o Senedd Cymru dros Aberconwy – Janet Finch-Saunders AS – wedi tynnu sylw at rwystredigaeth barhaus busnesau lleol ynghylch meini prawf Llywodraeth Cymru ar gyfer cymorth ariannol y Coronafeirws, wedi'r cyhoeddiad y bydd pecyn cymorth brys yn talu'r costau gweithredu ar gyfer Gorffennaf ac Awst 2021.
Roedd datganiad Gweinidog yr Economi heddiw, a ryddhawyd i'r wasg unwaith eto cyn y drafodaeth yn y Senedd, yn amlinellu y bydd gan fusnesau cymwys hawl i daliad ychwanegol o rhwng £1,000 a £25,000, yn dibynnu ar eu maint, eu strwythur a'u hamgylchiadau. I fod yn gymwys, rhaid i fusnesau ddangos bod eu trosiant wedi gostwng mwy na 60% o gymharu â'r cyfnod cyfatebol yn 2019 neu gyfwerth.
Wrth sôn am rwystredigaethau lleol, dywedodd Janet:
“Wrth gwrs, mae unrhyw gefnogaeth i fusnesau Cymru yn rhywbeth i'w groesawu, ond gresyn bod rhaid i fusnesau ragweld yr incwm a gollir cyn misoedd yr haf unwaith eto gan fod y gronfa'n cau ym mis Gorffennaf. Roedd hyn yn rhwystr dryslyd i fynediad yn ystod y rownd ddiwethaf.
“Mae'r bwriad i gau'r cynllun hwn ganol mis Gorffennaf yn golygu y bydd busnes lleol a allai ddioddef achos anffodus o Covid-19 yn cael ei orfodi i gau, heb gymorth ariannol o bosibl, gan eu bod wedi rhagweld heb unrhyw fai arnyn nhw, na fyddent yn profi 60% yn llai o drosiant yn ystod tymor yr haf.
“Fel mae datganiad y Gweinidog yn rhagweld, dyma fydd y pecyn terfynol o gymorth brys i'r busnesau hynny sy'n gallu masnachu – bydd busnesau angen gwybodaeth glir fel mater o frys i egluro a fydd cymorth ar gael iddyn nhw petaen nhw angen hynny mwya sydyn maes o law.
“Rhaid i'r cyhoeddiad heddiw am Gronfa Datblygu ac Adfer Busnesau yn y dyfodol hefyd geisio mynd i'r afael â phryder hirsefydlog hefyd sy'n atal llawer o fusnesau lletygarwch lleol rhag ailgychwyn eto – prinder staff. Gellir cyflawni hyn trwy dynnu sylw'n briodol at fanteision gyrfa yn y sector gwerth chweil hwn i'n pobl ifanc a cheiswyr gwaith."
DIWEDD
Nodiadau i Olygyddion:
- Bydd y gronfa'n agor i geisiadau ddydd Mawrth 13 Gorffennaf 2021 ac ar agor am bythefnos, cyn cau ddydd Gwener 23 Gorffennaf 2021.
- Gallwch weld datganiad y Gweinidog yma.
