Unwaith eto, mae Lesley Griffiths AC, Gweinidog yr Amgylchedd, Ynni a Materion Gwledig wedi gwrthod cynnal ymchwiliad annibynnol i fesurau lliniaru llifogydd yn Nyffryn Conwy. Mae’n disgwyl i Gyngor Bwrdeistref Sirol Conwy a Cyfoeth Naturiol Conwy i ymchwilio i’r hyn sydd angen ei wneud, a byddwn yn aros am eu hargymhellion cyn penderfynu pa gamau i’w cymryd.
Hyn mewn ymateb i gwestiwn brys a gododd Janet Finch-Saunders, AC Aberconwy, a holodd y canlynol:
- All y Gweinidog ddweud wrthyf pam nad oedd rhybuddion llifogydd arferol Cyfoeth Naturiol Cymru ar waith mewn da bryd, o gofio’r holl fwletinau newyddion fod storm Ciara ar ei ffordd?
- Gan fod hwn yn cael ei ystyried yn ddigwyddiad sylweddol, pa gyllid fydd ar gael gan Lywodraeth Cymru i’r Awdurdod Lleol er mwyn helpu gyda’r gwaith clirio, a sut fydd hyn yn treiddio drwodd i’r holl drigolion a busnesau a gafodd eu taro mor wael, rhai ohonynt heb yswiriant oherwydd lefel y perygl llifogydd?
- O gofio’r digwyddiadau truenus dros y penwythnos, a fyddwch chi nawr yn adolygu’r cyngor a gawsoch gan Cyfoeth Naturiol Cymru, ac yn cefnogi’r galwadau niferus am adolygiad annibynnol o fesurau lliniaru llifogydd yn Nyffryn Conwy?
- A ddowch chi i Aberconwy i ymweld â’r rhai sydd wedi’u heffeithio fwyaf gan y digwyddiadau diweddar?
Mewn ymateb i’r Gweinidog, meddai Janet:
“Rwy’n rhwystredig na allai’r Gweinidog roi’r sicrwydd yr oeddwn i wedi’i obeithio amdano heddiw.
“Roeddwn i’n Llanrwst ddoe, a chefais gyfle i weld yr holl lanast a’r difrod enbyd a achoswyd i siopau, busnesau a chartrefi, â’m llygaid fy hun.
“Mae’n dorcalonnus gweld unigolion yn gwbl ddiymadferth wrth frwydro i glirio’r mwd a’r carthion o’u cartrefi.
“Rydyn ni angen ymchwiliad annibynnol er mwyn ystyried y darlun cyfan.
“Yr awdurdod lleol a Cyfoeth Naturiol Cymru oedd yn gyfrifol am ymchwilio i achosion y llifogydd fis Mawrth diwethaf, ac edrychwch lle rydyn ni arni heddiw.
“Rwy’n ofni na fydd ymchwiliadau’r awdurdod lleol a CNC yn mynd ddigon pell, ac y gwelwn ni achosion yr un mor ddifrifol o lifogydd mewn rhannau eraill o Lanrwst a’r Dyffryn cyn hir.
“Rwy’n erfyn ar CNC a’r awdurdod lleol i roi blaenoriaeth i gynnal ymchwiliadau a rhannu eu hargymhellion yn fuan iawn.
“Yn y tymor byr, mae angen i’r Gweinidog ddefnyddio’r Cynllun Cymorth Ariannol Brys i roi cymorth dewisol i’r awdurdod lleol er mwyn sicrhau nad yw’n wynebu baich ariannol diangen wrth roi cymorth a chynnal gwaith uniongyrchol yn sgil argyfwng mor fawr”.
DIWEDD
Lluniau:
Janet Finch-Saunders AC yn gofyn y cwestiwn brys; Llifogydd Llanrwst
