Heddiw (11 Ionawr), mae Janet Finch-Saunders AC Aberconwy wedi croesawu'r newyddion bod Cyfoeth Naturiol Cymru (CNC) wedi cytuno i ddirymu ardrethi draenio Ardal Draenio Mewnol Afon Conwy yn llawn ar gyfer talwyr y tu ôl i Arglawdd Tan Lan.
Mae ardaloedd draenio yn bodoli ar wastatir fel arfer. Mae'r penderfyniad dirymu yn dilyn ymgyrch galed gan Mrs Finch-Saunders, a gyflwynodd lawer o sylwadau ffurfiol dros fisoedd lawer er mwyn deisebu am y canlyniad hwn.
Wrth sôn am y canlyniad cadarnhaol i ffermwyr lleol, dywedodd Janet:
“Rwy'n falch iawn bod fy ymgyrch dros ddirymu ardrethi draenio IDD 100% ar gyfer y rhai y tu ôl i Arglawdd Tan Lan wedi arwain at ganlyniad cadarnhaol i'r trigolion dan sylw.
“Rwy'n credu ers tro mai dim ond dirymu ardrethi llawn fyddai'n adlewyrchu'n ddigonol y costau mae'r ceidwaid tir lleol hyn wedi'u hysgwyddo o ganlyniad i waith diweddar i Arglawdd Tan Lan.
“Hoffwn ganmol gwaith pwysig y ffermwyr lleol ar amddiffynfeydd llifogydd yn dilyn penderfyniad Cyfoeth Naturiol Cymru i wrthod gwneud gwaith cynnal a chadw tan ddiwedd eu hastudiaeth hyfywedd. Yn bwysicach, mae eu gwaith caled dros y misoedd diwethaf wedi sicrhau bod yr amddiffyniad hwn yn barod at fisoedd gwlyb y gaeaf.
“Er fy mod i'n sicr yn croesawu'r ateb cadarnhaol hwn i bryderon ardrethi IDD lleol, rwy'n ymrwymo'n llwyr i sicrhau bod CNC yn atebol am glirio'r ffosydd ar hyd afon Conwy.
“Fel y dywedais wythnos diwethaf, mae'n warthus na wnaeth CNC drefnu cyfarfod o Grŵp Cynghori IDD Dyffryn Conwy yn dilyn y llifogydd dinistriol Storm Ciara y llynedd. Rwy'n credu bod criw CNC yn llawn bwriadau da, ond yn boddi dan waith yn rheolaidd.
DIWEDD
Llun: Arglawdd Tan Lan 2020
