Unwaith eto, mae Janet Finch-Saunders, yr Aelod o'r Senedd dros Aberconwy a Hyrwyddwr Pobl Hŷn y Ceidwadwyr Cymreig, mewn cwestiynau i'r Dirprwy Weinidog a'r Prif Chwip, wedi tanlinellu ei hymrwymiad i gynnig deddfwriaeth a fyddai'n diogelu ac yn hyrwyddo hawliau pobl hŷn yng Nghymru.
Wrth danlinellu'r angen am ddeddfwriaeth o'r fath, dywedodd Janet:
“Yn ôl Egwyddorion y Cenhedloedd Unedig ar gyfer Pobl Hŷn, dylai ein pobl fwyaf agored i niwed gael mynediad at ofal iechyd digonol, dylent allu byw mewn amgylcheddau sy'n ddiogel, dylent elwa ar ofal a diogelwch cymunedol, a dylent gael eu trin yn deg.
“Mae profiadau pobl hŷn yn ystod y pandemig hwn wedi cryfhau'r achos dros ddiogelu eu hawliau ymhellach yn y gyfraith a thros sicrhau bod yna well gwybodaeth am yr hawliau hyn a gwell cydnabyddiaeth ohonyn nhw. Mae Cymru ymhell o fod wedi cyflawni cynifer o'r egwyddorion hollbwysig hyn.
“O ystyried mai Bwrdeistref Sirol Conwy sydd â'r ganran uchaf o bobl hŷn dros 65 oed, rydw i wedi bod yn gefnogwr brwd ers tro byd i Fil i ymgorffori hawliau pobl hŷn Cymru yn ein deddfwrfa. Gyda symudiad o'r fath yn cael cefnogaeth y Comisiynydd Pobl Hŷn, mae'n bryd i Lywodraeth Cymru sylweddoli'r pethau cadarnhaol y gallai Bil o'r fath eu cyflwyno.”
Diwedd
Llun: Siarhei Plashchynski on Unsplash/
