Yn dilyn llythyrau’r Aelod at Heddlu Gogledd Cymru a Chyngor Bwrdeistref Sirol Conwy yr wythnos diwethaf, ynghylch yr angen i wella diogelwch cerddwyr ar frys ar hyd Ffordd y Frenhines yng Nghraig-y-Don, mae Janet Finch-Saunders AS wedi croesawu’r newyddion y bydd swyddogion yn cadw llygad ar y ffordd.
Wrth gyfeirio at y newyddion, dywedodd Janet:
“Rwy’n hynod o falch bod Heddlu Gogledd Cymru wedi cyhoeddi y byddant yn anfon swyddogion yno i warchod rhag goryrru, yn sgil fy llythyr atynt yn mynegi fy mhryder yr wythnos diwethaf. Mae hwn yn gam hanfodol a chadarnhaol i’r cyfeiriad cywir sy’n sicrhau y bydd ein pryderon yn cael sylw.
“Gyda’r broblem barhaus yn peri risg wirioneddol i ddiogelwch plant ifanc lleol, roedd fy llythyr yn glir y dylid trin y mater hwn fel blaenoriaeth. Bydd presenoldeb gweledol yr heddlu yn cael ei groesawu, a bydd yn cynnig tawelwch meddwl i’r holl rieni sydd wedi cysylltu â’m swyddfa i fynegi eu pryderon.
“Byddaf yn parhau i weithio gyda’r holl randdeiliaid dan sylw, gan gynnwys grŵp ardderchog Cyfeillion Queen’s Park, i sicrhau bod buddsoddi mewn unrhyw fesurau tawelu traffig hirdymor yn adlewyrchu’r defnydd cynyddol o gyfleusterau nodedig y parc.”
DIWEDD
