Heddiw (25 Tachwedd), mae Janet Finch-Saunders AS - Aelod o’r Senedd dros Aberconwy - wedi erfyn ar Lywodraeth Cymru i hybu’r defnydd o ysbytai rhydd o Covid ledled Cymru, fel ffordd o sicrhau bod llwybrau gofal cleifion yn cael eu rheoli’n briodol.
Mae'r amseroedd aros i'r rhai sy'n aros mwy na 36 wythnos wedi cynyddu 8 gwaith ers dechrau'r pandemig, gyda 168,944 o bobl yn dal i aros dros 36 wythnos am driniaeth. Rhagwelir y gallai hyd at 2,000 o bobl farw oherwydd oedi cysylltiedig â COVID yn GIG Cymru, ac mae hynny’n destun pryder.
Roedd yr aelod yn siarad fel rhan o ddadl y Ceidwadwyr Cymreig ynghylch effaith COVID-19 ar wasanaethau iechyd. Gallwch ddarllen trawsgrifiad o'r ddadl hon trwy glicio yma.
Wrth sôn am ei chyfraniad heddiw, dywedodd Janet:
“Mae’n rhaid i mi nodi’n glir nad oes a wnelo unrhyw bryderon neu feirniadaeth sydd gan fy etholwyr a minnau â’r arwyr rheng flaen sydd wedi brwydro mor ddewr yn erbyn y pandemig, ond yn hytrach gyda methiannau rheoli Llywodraeth Llafur Cymru dros gymaint o flynyddoedd.
“Ni ddylem fod o dan unrhyw gamargraff ynghylch y straen y mae ein gwasanaeth iechyd oddi tano. Nid yw’r targed o 95% ar gyfer cleifion sy'n treulio llai na phedair awr mewn unedau damweiniau ac achosion brys a thargedau amseroedd aros canser wedi eu cyflawni ers deng mlynedd. Ar sawl ystyr, mae'r pandemig presennol wedi tynnu sylw at fethiannau rheoli Llywodraeth Lafur Cymru dros gyfnod o ugain mlynedd.
"Dyma pam fy mod i’n galw ar Lywodraeth Cymru i roi hwb ar unwaith i'r defnydd o ysbytai rhydd o COVID, fel yr argymhellwyd gan Goleg Brenhinol y Llawfeddygon a Choleg Brenhinol Meddygaeth Frys. Ledled y DU, gallai sefydlu 19 o ardaloedd rhydd o COVID atal 6,000 o farwolaethau diangen yn gysylltiedig â COVID-19 ar ôl llawdriniaeth canser dros y flwyddyn nesaf.
"Mae system gofal iechyd Cymru yn fregus iawn ac yn wynebu tswnami o broblemau iechyd cyhoeddus o ganlyniad i oedi triniaethau. Mae'r methiant i ddefnyddio capasiti'r ysbytai maes ac annibynnol wedi rhoi pwysau ar yr ysbytai presennol yn ystod yr ail don. Ni ellir caniatáu i'r camgymeriadau hyn barhau. "
DIWEDD
Ffoto: Artur Tumasjan ar Unsplash
