Wrth barhau â'i hymgyrch i roi terfyn ar ymosodiadau diangen ar ddefaid, mae'r Aelod o Senedd Cymru dros Aberconwy – Janet Finch-Saunders AS – wedi pwyso ar Lywodraeth Cymru i gynnal ymgyrch ar y cyfryngau digidol er mwyn helpu i atal digwyddiadau o’r fath dros yr haf.
Mewn Cwestiwn Ysgrifenedig i'r Gweinidog dros Faterion Gwledig, gofynnodd Janet:
“Pa gamau y mae Llywodraeth Cymru yn eu cymryd i weithredu ymgyrch cyfryngau digidol i annog ymwelwyr gwledig i gadw eu cŵn ar dennyn er mwyn atal ymosodiadau sy'n aflonyddu ar ddefaid?
Daw ei hymyrraeth wrth i'r broblem gael mwy o sylw prif ffrwd. Nos Sul, ymddangosodd Dan Jones (bugail Pen y Gogarth) ar raglen Countryfile BBC One i godi ymwybyddiaeth o effaith digwyddiadau o'r fath ar ffermwyr, perchnogion cŵn a'u hanifeiliaid anwes.
Wrth sôn am yr angen i godi ymwybyddiaeth, dywedodd Janet:
“Roedd canlyniadau arolwg 2021 y Gymdeithas Ddefaid Genedlaethol yn peri pryder mawr i mi, gan ddangos bod ffermwyr, ar gyfartaledd, wedi profi saith achos o boeni defaid yn ystod y flwyddyn ddiwethaf a arweiniodd at anafu pum dafad a lladd dwy fesul ymosodiad. Yn aml, ni chafodd ymatebwyr fawr o iawndal os o gwbl.
“Ond yn fwy na'r effaith economaidd, mae'r digwyddiadau hyn yn cynyddu pryder, straen a rhwystredigaeth ddiangen i'n harwyr amaethyddol. Tanlinellwyd effaith y digwyddiadau hyn, y gellir eu hatal, yn stori rymus Dan Jones, bugail Pen y Gogarth, ar raglen deledu flaenllaw'r BBC dros y penwythnos.
“Gyda nifer yr ymwelwyr â'n cymunedau gwledig hardd yn debygol o gynyddu yr haf hwn, dylai Llywodraeth Cymru fynd ati yn awr i weithredu ymgyrch gyhoeddusrwydd ddigidol ar y cyd â Croeso Cymru. Mae'r neges gadarnhaol sydd angen ei chyfleu yn syml – cadwch eich ci ar dennyn.
“Er fy mod i wedi 'nghalonogi'n fawr gan y mesurau diweddar sydd yn y Bil Lles Anifeiliaid diweddar, a osodwyd gerbron Senedd San Steffan, gall Llywodraeth Cymru chwarae rhan weithredol hefyd yn y gwaith o addysgu ymwelwyr i fwynhau ein cefn gwlad godidog mewn modd diogel a buddiol i bawb."
DIWEDD
Nodiadau i Olygyddion:
- Cyflwynwyd mesurau i fynd i'r afael â digwyddiadau o'r fath yn y Bil Lles Anifeiliaid (Anifeiliaid a Gedwir), a gyflwynwyd i Senedd y DU ym mis Mehefin 2021 sy'n cynnwys pwerau gwell i helpu'r heddlu i ymateb i achosion sy'n gallu arwain at anafiadau sylweddol, dioddefaint a marwolaeth i anifeiliaid fferm, ac achosi trallod a chostau ariannol i ffermwyr.
Llun: gan Sam Carter ar Unsplash
