Mae Janet Finch-Saunders MS – Aelod o’r Senedd dros Aberconwy – yn cefnogi galwadau arweinwyr busnes y Gogledd heddiw (24 Mehefin) i greu cronfa sbarduno gwerth £700,000 er mwyn helpu i ailgynnau economi'r rhanbarth.
Fel rhan o'r gronfa, byddai gweithwyr llawrydd lleol, pobl hunangyflogedig a microfusnesau yn cydweithio i ddatblygu a chynnig cynhyrchion a gwasanaethau newydd. Byddai’n helpu i gyflymu buddsoddiadau cyfalaf mawr newydd yn y Gogledd hefyd.
Yn ystod dadl y Ceidwadwyr Cymreig ar COVID-19 a'r economi, pwysodd hefyd ar Lywodraeth Cymru i ystyried:
- Sefydlu Cronfa Adfer Cymunedol COVID er mwyn darparu cymorth economaidd wedi’i dargedu i'r rhanbarthau hynny sydd ei angen fwyaf.
- Ategu'r gronfa hon â Pharthau Busnes Heb Ardrethi lle byddai pob busnes yn cael ei eithrio rhag talu ardrethi busnes am hyd at dair blynedd.
- Diwygio'r Gronfa Cadernid Economaidd fel bod busnesau sy'n parhau i ddisgyn drwy'r rhwyd yn gallu cyflwyno cais am gymorth yn ôl disgresiwn.
Wrth siarad yn dilyn ei chyfraniad i'r cyfarfod llawn rhithwir, dywedodd Janet:
“Mae pandemig COVID-19 wedi taro Aberconwy, fy etholaeth, o bob cwr. Gyda chyfran uwch o weithwyr yn gweithio mewn diwydiannau a gafodd eu heffeithio fwyaf gan y cyfyngiadau symud, daeth astudiaeth ddiweddar i'r casgliad mai Conwy yw'r sir sy’n wynebu colli’r nifer mwyaf o swyddi yng Nghymru gyfan.
“Er gwaethaf fy llythyrau a'm cyfarfodydd niferus gyda Gweinidogion Llywodraeth Cymru, rwy'n siomedig bod gweinyddiaeth Mark Drakeford wedi gwrthod gweithredu ar fy nghynnig i lunio strategaeth wedi'i theilwra, er mwyn helpu'r rhanbarthau hynny sy'n dioddef waethaf.
“Unwaith eto, rwy'n gofyn i Lywodraeth Cymru ystyried y dull synhwyrol hwn. Byddai'r syniad o sefydlu Cronfa Sbarduno yn fan cychwyn da, er mwyn annog cydweithredu rhwng gweithwyr llawrydd lleol, pobl hunangyflogedig a microfusnesau i ddatblygu cynhyrchion a gwasanaethau newydd.
“Ni allwn adael i'r pandemig Coronafeirws adael y rhanbarth a'i fusnesau ar eu gliniau. Mae angen ymateb arloesol ac uniongyrchol gan Lywodraeth Cymru er mwyn adfer hyder yn economi'r Gogledd.
DIWEDD
