I nodi Diwrnod Rhyngwladol Pobl Hŷn y Cenhedloedd Unedig, mae Janet Finch-Saunders AS - Aelod o’r Senedd dros Aberconwy - wedi galw ar Lywodraeth Cymru i ymgysylltu â darparwyr gwasanaethau ariannol er mwyn codi ymwybyddiaeth o sgamiau ar-lein i’r bobl fwyaf bregus yn ein cymdeithas.
Mewn Cwestiwn Ysgrifenedig i’r Gweinidog Cyfiawnder Cymdeithasol, gofynnodd Janet:
“A wneith y Gweinidog gadarnhau pa sgyrsiau mae Llywodraeth Cymru wedi’u gael gyda darparwyr gwasanaethau ariannol ynghylch cynyddu ymwybyddiaeth llythrennedd digidol a sgamiau ymhlith pobl hŷn, yn dilyn canfyddiadau arolwg Hourglass a Hodge Bank?”
Daw’r ymyrraeth yn dilyn canfyddiadau arolwg a gomisiynwyd gan Hourglass a Hodge o 2,000 o oedolion rhwng 45 a 70 oed, gan mai nhw yn aml sy’n gofalu am bobl hŷn neu sydd mewn perygl o gael eu cam-drin. Roedd dros chwarter (27%) yn adnabod neu’n gofalu am berson hŷn sydd wedi’i dargedu gan sgam ar-lein i gael mynediad at ei arian yn y flwyddyn ddiwethaf ac mae oddeutu 14% yn adnabod neu’n gofalu am berson sydd wedi dioddef cam-drin economaidd gan berson y dylent allu ymddiried ynddo.
Wrth nodi’r diwrnod ymwybyddiaeth rhyngwladol, dywedodd Janet:
“Wrth i fwy a mwy o elfennau ein bywydau bob dydd fynd yn ddigidol yn unig, mae llawer o’n pobl hŷn a bregus heb y gefnogaeth a mynediad priodol yn cael eu gadael ar ôl ac yn agored i rywun fanteisio arnynt. Mae pobl hŷn hefyd yn rhoi’r gorau i’w cyfrifoldebau mewn grwpiau cymunedol a grwpiau yn y capel a’r eglwys wrth i gymhlethdod gweithdrefnau bancio ar-lein gynyddu bob dydd.
“Cam-drin economaidd yw un o’r ffurfiau mwyaf cyffredin o gam-drin pobl hŷn. Rhwng 2017 a 2019, rwy’n cael ar ddeall bod 39% o alwadau i linell gymorth Hourglass ynghylch cam-drin economaidd. Mae’n frawychus hefyd bod yr Asiantaeth Troseddu Cenedlaethol hefyd wedi canfod bod yr henoed wedi’u targedu’n benodol gan dwyllwyr llwfr yn ystod y pandemig Covid-19.
“Datgelodd ymchwil gan Which bod pobl dros 60 oed yn llawer mwy agored i dwyll cyfrifiadurol, gan fod llythrennedd technegol yn tueddu i fod yn is. Dyma pam ein bod angen gweld mwy o gydweithio rhwng Llywodraeth Cymru a darparwyr gwasanaethau ariannol fel bod pob bygythiad a ddaw yn sgil yr arena ar-lein yn gallu cael ei atal drwy hyder ac addysg.”
DIWEDD
Nodiadau i Olygyddion:
- Thema Diwrnod Rhyngwladol Pobl Hŷn 2021 yw “Cydraddoldeb Digidol ar gyfer Pob Oed” sy’n cadarnhau’r angen i bobl hŷn gael mynediad i’r byd digidol a chael cymryd rhan ynddo mewn ffordd ystyrlon. Rhagor o wybodaeth yma.
- I ddarllen am ymyrraeth ddiweddar Janet ynghylch pryderon grwpiau cymunedol lleol am gael mynediad at gyfrifon banc, cliciwch yma.
