Mae Aelod o'r Senedd dros Aberconwy – Janet Finch-Saunders AS – wedi croesawu'r newyddion bod Llandudno wedi ailgodi ar ei thraed gyflymaf ers cyfnodau clo'r DU, o gymharu â holl strydoedd mawr y DU. Roedd adroddiad newydd gan Takepayments Limited yn ystyried data o wythnos llacio’r cyfyngiadau olaf yn Lloegr (19 Gorffennaf 2021). Er na chafodd cyfyngiadau Cymru eu llacio ar yr un dyddiad, gwelwyd bod pobl wedi gwario 46% yn fwy gyda chardiau banc yn Llandudno o gymharu â'r un cyfnod cyn y pandemig (2019).
Wrth groesawu data hwn, dywedodd Janet:
“Mae'n drist bod y stryd fawr draddodiadol wedi'i chael hi'n anodd dros y blynyddoedd diwethaf wrth i ni newid ein ffordd o siopa. Mae'r ffaith bod Llandudno fel petai’n troi’r duedd negyddol hon ar ei phen, gan ddenu ymwelwyr sydd yr un mor debygol o wario arian wrth grwydro Dyffryn Conwy a'r cyffiniau, yn arwydd calonogol dros ben.
“Mae perchnogion busnesau lleol wedi dweud wrthyf fod y pythefnos diwethaf wedi bod yn brysurach nag erioed, gyda thymor yr haf eleni, er yn fyrrach nag arfer, yn gryn hwb. Mae'r gwestai yn llawn dop, buddsoddiadau sylweddol yn cael eu gwneud i ehangu'r cynnig twristiaeth, a chymaint o frwdfrydedd dros gryfhau'r sector fwy fyth.
“Gyda brenhines trefi glan môr Cymru wedi'i dewis fel un o drefi arfordirol prydfertha'r DU mewn arolwg diweddar ac wedi ennill y wobr aur yn nosbarth ‘Cymunedau Arfordirol’ Cymru yn ei Blodau, mae'n amlwg ein bod ni'n parhau i gynnig fformiwla llwyddiannus yng Nghymru am wyliau neu wibdaith hamddenol braf.
“Wrth edrych i'r dyfodol, mae'n hollbwysig nad yw Llywodraeth Cymru yn cyflwyno unrhyw gyfyngiadau diangen o gymhleth a allai effeithio ar yr adferiad hwn, megis pasbortau brechu sy'n heriol yn foesegol ac yn weithredol. Gyda phrinder staffio eisoes yn effeithio ar rai busnesau, rhaid peidio pentyrru rhagor o broblemau a phryderon ar ein perchnogion busnesau ar ben eu prysurdeb gwaith."
DIWEDD
Llun: Janet Finch-Saunders AS yn croesawu Prif Weinidog Prydain, Boris Johnson AS San Steffan, i Landudno.
