Mae Janet Finch-Saunders AS, Aelod o’r Senedd dros Aberconwy, wedi canmol gwaith Gwasanaethau Gofal Croesffyrdd Gogledd Cymru yr Ymddiriedolaeth Gofalwyr ar ymweliad â hwb Dementia newydd y sefydliad ar gyfer Gogledd Cymru ym Mharc Menter Quinton Hazell ym Mochdre, Bae Colwyn.
Diben yr ymweliad oedd dysgu am y gwasanaethau sydd ar gael i breswylwyr ledled y Gogledd a daeth Dr James Davies AS yno gyda Janet Finch-Saunders AS. Mae’r Ganolfan yn cynnig cyngor, gwybodaeth a chymorth ymarferol i bobl sydd â dementia, ac i’w teuluoedd. Gall preswylwyr ffonio’r Ganolfan i sgwrsio gyda gweithwyr proffesiynol wedi’u hyfforddi am y gwasanaethau sydd ar gael, neu i drefnu apwyntiad ar 01492 542212.
Yn rhoi sylwadau ar ei hymweliad, dywedodd Janet:
“Mae dementia yn effeithio ar oddeutu 42,000 o bobl ledled Cymru yn ôl y GIG, sy’n golygu, ar sail ein cyfran o’r boblogaeth, bod yn rhaid i o leiaf 10,000 o breswylwyr a’u gofalwyr yn y Gogledd ymdopi ag ef.
“Yr hyn y mae’r Ymddiriedolaeth Gofalwyr yn ei gynnig drwy ei chanolfan ragoriaeth - drwy grwpiau cyngor, caffis dementia a chymorth i fanteisio ar weithgareddau cymdeithasol - yw’r union fath o brosiect sydd ei angen i sicrhau nad yw pobl fwyaf bregus yn ein cymdeithas, a’r llu o ofalwyr di-dâl sy’n gofalu amdanynt gyda chariad, yn llithro drwy’r rhwyd.
“Er bod yn rhaid i Lywodraeth Cymru gyhoeddi Cynllun Gweithredu Dementia wedi’i ddiweddaru cyn gynted ag y mae’r un presennol yn dod i ben, yn gynt yn y mis ymunais â chydweithwyr o bob rhan o’r Siambr i alw ar sefydlu Arsyllfa Data Dementia Cenedlaethol er mwyn i ni allu datblygu adnoddau diagnostig cywir yn well i sicrhau y gall pobl gael mynediad at y cymorth cywir ar ôl cael diagnosis.
“Fel y mae Cymdeithas Alzheimer’s Cymru wedi’i bwysleisio, mae Cymru mewn safle unigryw gyda mynediad at gyllid penodol ar gyfer dementia ac ymchwilwyr dawnus yn y maes. Mae’n hollbwysig ein bod yn adeiladu ar y ffaith hon er mwyn sicrhau y gall cyllid ar gyfer hybiau dementia tebyg gael ei ddarparu i roi seibiant i’n gofalwyr.”
DIWEDD
Ffoto: Janet Finch-Saunders AS gyda James Davies AC ac aelodau hyb Dementia Gogledd Cymru, Gwenno ac Alison.
