Yn dilyn llifogydd difrifol ledled y Gogledd dros y pedair awr ar hugain diwethaf, mae Aelod o’r Senedd dros Aberconwy – Janet Finch-Saunders AS – wedi galw eto heddiw ar i Lywodraeth Cymru drefnu ymchwiliad annibynnol i ddigwyddiadau llifogydd lleol.
Mae Storm Christoph wedi cau ffyrdd lleol a tharfu ar drafnidiaeth gyhoeddus. Mae swyddogion wedi rhybuddio trigolion lleol i beidio â gwneud unrhyw deithiau diangen, a allai roi pwysau ychwanegol ar adnoddau prin. Mae rhybudd llifogydd yn parhau mewn grym ar gyfer rhannau o Ddyffryn Conwy ar adeg cyhoeddi.
Mae Mrs Finch-Saunders wedi bod yn ymgyrchydd brwd ynghylch materion llifogydd, ac mae wedi paratoi adroddiadau blynyddol i sicrhau bod newidiadau’n cael eu cyflwyno. Anogodd y weinyddiaeth ddatganoledig hefyd i adolygu effeithiolrwydd adroddiadau A.19 Deddf Rheoli Llifogydd a Dŵr 2010, gyda therfynau amser statudol wedi’u gosod ar gyhoeddi’r dogfennau ymchwiliol hyn. Mae’r adroddiadau hyn yn darparu argymhellion hanfodol sydd wedi’u cynllunio i liniaru’r risg o ddigwyddiadau o’r fath yn y dyfodol.
Wrth roi ei sylwadau, dywedodd Janet:
“Yn anffodus, mae Christoph yn storm arall sydd wedi effeithio’n bersonol ar lawer o fy etholwyr. Er fy mod i’n croesawu’r ffaith bod cartrefi Llanrwst wedi osgoi difrod, mae’n drychinebus gweld bod y storm wedi achosi gorbryder i gynifer o drigolion lleol. Rwy’n parhau i fod wrth law i helpu lle bo’n bosibl.
“Rwy’n drist hefyd bod Castell Gwydir, yr atyniad a’r ardd enwog o arwyddocâd hanesyddol yn Nyffryn Conwy, wedi’i daro gan lifogydd difrifol unwaith eto, ar ôl i Stormydd Dennis a Ciara effeithio arno’n wael y llynedd.
“O ganlyniad i hyn, rwyf wedi galw o’r newydd am ymchwiliad annibynnol i ddigwyddiadau llifogydd lleol cyson, a fyddai’n helpu i sicrhau bod dull gweithredu Llywodraeth Cymru yn newid o fod yn adweithiol i fod yn rhagweithiol. Rwy’n annog yr holl drigolion lleol i lofnodi fy neiseb i orfodi camau gweithredu ar y mater pwysig hwn.
“Mae’r llifogydd hyn yn digwydd yn rhy aml o lawer, sy’n dangos yn glir beth yw gwir fygythiad y newid yn yr hinsawdd i drefi a phentrefi Conwy. Gan fod amcanestyniadau gwyddonol yn awgrymu y gall Cymru ddisgwyl digwyddiadau tywydd eithafol yn amlach, mae’n rhaid i ni ddiogelu ein trigolion agored i niwed yn well.
“Os yw Llywodraeth Cymru o ddifrif am ei hymrwymiad i ymgysylltu’n rhagweithiol â’r gymuned fel ffordd o ddatblygu strategaethau atal llifogydd lleol, rwy’n ei hannog i adolygu a gweithredu’r cynigion yr wyf wedi’u cyflwyno sawl gwaith. Mae’n bryd gweithredu – rŵan.”
DIWEDD
Nodiadau i Olygyddion:
· Mae hyn yn rhan o ymgyrch hir ar lifogydd yng Nghymru. Gallwch weld rhagor o wybodaeth drwy fynd i www.janetfinchsaunders.org.uk. Mae’n cynnwys galwadau Janet am amserlenni statudol i helpu gydag adroddiadau ar lifogydd yn y dyfodol, y gellir eu darllen yma.
