Heddiw (25 Medi), mae Janet Finch-Saunders AS – Aelod o’r Senedd dros Aberconwy – wedi siarad am ei phryder mawr yn sgil datgelu’r ffaith bod oddeutu £916,000 wedi’i wario ar gynnal a chadw ac atgyweiriadau i Swyddfa Llywodraeth Cymru yng Nghyffordd Llandudno, rhwng 2017 a 2020.
Daeth y ffigurau yn sgil Cwestiwn Ysgrifenedig a gyflwynwyd gan Mrs Finch-Saunders, sy’n dilyn datgeliad ganddi yn 2018 fod £2,246,000 wedi'i wario ar gynnal a chadw’r adeilad yn ystod y saith blynedd gyntaf. Agorodd swyddfa Cyffordd Llandudno yn 2010.
Mae’r rhan fwyaf o’r arian sydd wedi’i wario ers blwyddyn ariannol 2017/2018 wedi’i wario ar atgyweiriadau a phrynu nwyddau newydd, gwerth £543,000 i gyd. Mae hyn yn cynnwys gwariant o tua £224,000 ym mlwyddyn 2018/19 yn unig. Mae’r holl ffigurau sydd wedi’u cynnwys yn y datgeliad gan Lywodraeth Cymru wedi’u talgrynnu i’r mil agosaf.
Gan roi sylwadau ar y ffigurau, dywedodd Janet:
“Dwi’n bryderus iawn ynghylch y ffigurau hyn gan Lywodraeth Cymru, sy’n datgelu gwariant sylweddol i atgyweirio adeilad sydd ond wedi bod yno ers degawd. Mae swyddfa’r Gogledd wedi bod yn gur pen ariannol yn anffodus a dyw hi ddim yn edrych fel bod pethau am wella.
“Mae’n rhaid i ni gofio bod agor yr adeilad Llywodraeth Cymru hwn yn 2010 yn rhan o brosiect £91.5 miliwn gan Lywodraeth Cymru a welodd tua £23 miliwn yn cael ei wario ar y swyddfeydd yng Nghyffordd Llandudno.
“Felly, mae’n gwbl annerbyniol bod dros hanner miliwn o bunnoedd wedi’u gwario ar atgyweiriadau a nwyddau newydd yn ystod y tair blynedd ariannol diwethaf. Ychwanegwch at hyn y bil atgyweiriadau o £1,112,000 a ddatgelwyd am y saith blynedd hyd 2017, ac mae’n amlwg fod gan y swyddogion sy’n gyfrifol am gynnal a chadw’r adeilad gwestiynau mawr i’w hateb.
“O ystyried yr hinsawdd economaidd, a’r cyfnod o adfer yn sgil Coronafeirws sy’n ein hwynebu, ni ellir gwario symiau fel hyn ar brosiectau ymffrost Llywodraeth Cymru. Mae’n rhaid i weinyddiaeth Mark Drakeford egluro ar unwaith i bobl y Gogledd sut mae’r swyddfa hon wedi cael bod yn dwll ym mhwrs y trethdalwr.”
DIWEDD
