Mae’r Aelod o’r Senedd dros Aberconwy, Janet Finch-Saunders AS, wedi dathlu'r ffaith bod Gwobrau Busnes y Daily Post/North Wales Live yn eu hôl, yn dilyn bwlch o flwyddyn, gan annog busnesau o bob rhan o'r etholaeth i enwebu eu hunain neu eraill.
Eleni, mae 10 categori ar wahân yn amrywio o Fusnes Newydd y Flwyddyn i bencampwyr gwyrdd. Mae rhestr lawn o gategorïau i'w gweld ar wefan y Gwobrau. Bydd y seremoni yn cael ei chynnal ddydd Mercher 15 Rhagfyr ym Mhrifysgol Bangor, dan ofal cyflwynydd tywydd ITV Emma Jesson.
Wrth annog busnesau lleol i gymryd rhan, dywedodd Janet:
“O'n cynhyrchwyr bwyd a diod sy'n ennill enw da yn fyd-eang am eu hansawdd, i'n busnesau lletygarwch a llety gwych sy'n sicrhau ein bod yn parhau i fod yn drysor yng nghoron twristiaeth Cymru a phrifddinas antur y DU; mae’r Gogledd, ac etholaeth Aberconwy yn arbennig, wedi'i bendithio ag ysbryd entrepreneuraidd ddiflino.
“Mae'r ffordd y mae ein busnesau lleol wedi llwyddo i bontio'r un mis ar hugain diwethaf, gyda chefnogaeth barhaus trigolion lleol ac er gwaethaf yr heriau o Fae Caerdydd, yn dyst i'w gwydnwch, eu dyfeisgarwch a'u hoptimistiaeth. Pa ffordd well o grisialu eu llwyddiant na thrwy fuddugoliaeth yn y gwobrau busnes rhanbarthol pwysig hyn?
“Mae'n wych gweld y gwobrau’n cael eu cynnal eto gan eu bod yn rhoi sylw haeddiannol iawn i ymdrechion ein cymuned fusnes. Rwy'n annog busnesau ac entrepreneuriaid lleol i gystadlu yn y gwobrau hyn fel y gellir cydnabod a hyrwyddo eich gwaith ar draws nifer o deitlau print a digidol.”
DIWEDD
Ffotograff: Janet Finch-Saunders AS/MS
