Heddiw (2 Gorffennaf), mae Aelod o’r Senedd Cymru dros Aberconwy – Janet Finch-Saunders AS – wedi annog y Prif Weinidog i egluro’r rhesymau dros ailagor caffis a bwytai mewn modd anghyfartal, gan ddweud mai’r rhain yw ‘pileri economi’r Gogledd.’
Daeth ei hymyriadau wrth i Lywodraeth Cymru gyhoeddi y gall tafarndai a bwytai Cymru agor i fasnachu yn yr awyr agored o 13 Gorffennaf. Mae Mrs Finch-Saunders nawr wedi cyflwyno Cwestiwn Ysgrifenedig i Mark Drakeford, sef:
A wnaiff y Prif Weinidog ddarparu’r dystiolaeth wyddonol a oedd yn dangos ei bod hi’n ddiogel i blant eistedd yn bwyta eu cinio mewn ystafell ddosbarth ond ei bod hi’n anniogel i unigolion eistedd mewn bwyty o 29 Mehefin 2020?
Wrth siarad am y sefyllfa y mae llawer o fasnachwyr lleol yn ei hwynebu, meddai Janet:
“Mae’n siomedig fy mod i’n gorfod parhau i bwyso ar Lywodraeth Cymru i ystyried effaith eu cyfyngiadau ar y sector lletygarwch.
“Er fy mod i’n croesawu cyhoeddiad heddiw i ganiatáu masnachu yn yr awyr agored, mae’n codi cwestiwn pam mae Llywodraeth Cymru’n caniatáu i’n plant gyfarfod a bwyta mewn ysgolion, ond yn atal oedolion rhag eistedd mewn bwyty lle y gellir gweithredu mesurau diogelwch priodol.
“Mae’r ddarpariaeth dwristiaeth ledled Aberconwy’n cynnwys llu o gaffis a bwytai gwych, sy’n defnyddio cynhwysion o Gymru ac maen nhw o fudd mawr i
gynhyrchwyr lleol. Mae’r pileri hyn yn economi’r Gogledd yn awyddus i gyfrannu at y gwaith o helpu adferiad y genedl o bandemig COVID-19.
“Mae’n rhaid i weinyddiaeth Mark Drakeford ddilyn arweiniad Llywodraeth y DU ar frys a gosod amserlen ar gyfer masnachu o dan do. Mae parhau i beidio â gweithredu ar y mater hwn yn costio swyddi a bywoliaeth pobl.”
DIWEDD
Llun: Katlyn Gibers/UnSplash
