Mae'r Aelod o Senedd Cymru dros Aberconwy – Janet Finch-Saunders AS – wedi croesawu ymrwymiad heddiw (10 Awst) i wella'r amodau traffig presennol o amgylch cylchfan Black Cat, sydd wedi datblygu o ganlyniad i waith gwella ffyrdd parhaus.
Daw'r cynnydd yn dilyn sgyrsiau rhwng Mrs Finch-Saunders ac Asiant Cefnffyrdd Gogledd a Chanolbarth Cymru (NMWTRA), sydd wedi cael y dasg o gyflawni'r gwelliannau ar Gyffordd 19 yr A55 ar ran Llywodraeth Cymru. Mae'r gwaith ffordd yn cynnwys lledu'r gyffordd, adeiladu croesfannau mwy diogel i gerddwyr a beicwyr, a gosod signalau traffig mewn lleoliadau allweddol.
Wrth sôn am ymrwymiad Llywodraeth Cymru, dywedodd Janet:
“Mae llawer o etholwyr wedi cysylltu â'm swyddfa yn poeni am yr holl dagfeydd sy'n deillio o'r gwaith ffordd hwn. Mae'r traffig yn cael effaith negyddol ar gymudo dyddiol ac yn gadael preswylwyr ac ymwelwyr yn eu hunfan am bron i ddeugain munud yn aml.
“Yn dilyn sgyrsiau gyda Llywodraeth Cymru, rwyf wrth fy modd bod rheolwr y rhaglen wedi ymrwymo i ymchwilio i bob cyfle posib i leihau'r probemau traffig presennol.
“Mae hwn yn ymrwymiad hollbwysig i sicrhau bod y tagfeydd presennol yn cael eu lleihau gymaint â phosibl, a bod y traffig yn llifo'n gynt ar hyd y ddwy lôn. Mae'r ymrwymiad o fudd i'r amgylchedd ac iechyd y cyhoedd hefyd, gan y bydd llai o ronynnau yn cael eu gollwng o bibelli gwacáu wrth ddisgwyl am gyfnodau maith.
“Hefyd, rwy’n falch o fod wedi sicrhau ymrwymiad gan Lywodraeth Cymru i godi arwyddion cyn croesfan sebra newydd Glan Conwy, i sicrhau bod ceir yn cael rhybudd am y newid mewn da bryd.
“Mae'r rhain yn arwyddion cadarnhaol o gynnydd, ac rwy'n gwerthfawrogi amynedd a chefnogaeth gadarn trigolion Glan Conwy yn fy ngwaith yn deisebu dros welliannau lleol.”
DIWEDD
