Yn dilyn y newyddion diweddar y bydd dwy ddeintyddfa yn y Gogledd yn cau, heddiw (25 Tachwedd), mae Janet Finch-Saunders AS - Aelod o’r Senedd dros Aberconwy - wedi croesawu cadarnhad y bydd Bwrdd Iechyd Prifysgol Betsi Cadwaladr yn mynd ati i geisio llenwi bwlch yn y ddarpariaeth sydd wedi’i cholli, gan roi addewid i fonitro’r sefyllfa hon sy’n datblygu.
Mewn ymateb i’r Cwestiwn Ysgrifenedig brys, ysgrifennodd y Gweinidog Iechyd a Gwasanaethau Cymdeithasol:
“O ran cau’r ddau bractis hyn, mae'n bwysig nodi bod cyllid ar gyfer gwasanaethau a gollir yn aros o fewn y Bwrdd Iechyd. Rwy’n disgwyl i’r Bwrdd Iechyd weithio i lenwi’r bwlch sydd wedi codi yn sgil colli’r ddarpariaeth ar unwaith a bod â mesurau interim ar waith i gynnig parhad gofal i gleifion a allai golli mynediad yn sgil y cau hwn.”
Dywed Bwrdd Iechyd Prifysgol Betsi Cadwaladr bod mwy nag 8,000 o gleifion y GIG wedi eu trin ym mhractis BUPA Bae Colwyn ac ychydig dros 4,200 yng Nghaernarfon yn ystod y ddwy flynedd ddiwethaf. Mae swyddogion y diwydiant bellach yn rhybuddio y gallai'r ôl-groniad presennol fod yn hel llawer o broblemau i’r dyfodol, wrth i ddarparwyr gwasanaethau yn canolbwyntio ar achosion brys ac argyfyngau.
Dyma oedd gan Janet i’w ddweud:
“Rwy’n croesawu’r eglurder y mae fy Nghwestiwn Ysgrifenedig brys wedi'i annog, gyda chadarnhad y bydd Bwrdd Iechyd Betsi Cadwaladr yn cael eu cynghori i roi blaenoriaeth i weithio i lenwi’r bwlch sydd wedi ymddangos yn sgil colli’r ddarpariaeth, a bod yn rhaid cyflwyno mesurau dros dro i gynnal parhad gofal y cleifion hynny a allai golli mynediad yn dilyn cau'r practis.
"Ond, fel rydw i wedi’i ddweud dro ar ôl tro, ni ellir gadael dyfodol gofal deintyddol o leiaf 12,000 o gleifion ledled y Gogledd yn llwyr yn nwylo BIPBC. Er bod eu Huned Addysgu Deintyddol arfaethedig ym Mangor yn gam i'r cyfeiriad cywir, mae Llywodraeth Cymru wedi anwybyddu’r sector hwn yn llawer rhy hir.
“Mae’r Gweinidog wedi tynnu ei lygad oddi ar y bêl, gydag amseroedd aros am driniaethau deintyddol yn cwympo ledled Cymru o’i gymharu â’r flwyddyn flaenorol. Ym mis Medi 2020, gwelwyd 33% o gleifion o fewn 26 wythnos, o'i gymharu â 70.5% ym mis Medi 2019. Mae'n amlwg nad yw’r gwasanaeth iechyd hanfodol hwn yn flaenoriaeth iddo.
"Byddaf yn parhau i fonitro'r sefyllfa hon, gan ddiweddaru etholwyr a chynnal cyfarfodydd gyda swyddogion o Fwrdd Iechyd Prifysgol Betsi Cadwaladr. Fodd bynnag, rwy’n annog Llywodraeth Cymru i adolygu ei hagwedd tuag at y sector hwn wrth i swyddogion y diwydiant barhau i rybuddio y gallai'r ôl-groniad presennol fod yn hel mwy o broblemau i’r dyfodol. "
DIWEDD
Ffoto: Ibrahim Boran ar Unsplash
