Heddiw (23 Medi), mae Janet Finch-Saunders AS – Aelod o’r Senedd dros Aberconwy – wedi sôn am ei phryder am y cynnydd mewn achosion o COVID-19 ledled y Gogledd, gan ofyn i Lywodraeth Cymru hwyluso’r profion sydd ar gael i gefnogi cynigion am gyfnodau clo lleol iawn.
Daw ei phryderon wrth i ni glywed bod awdurdodau lleol ledled y rhanbarth wedi’u galw i gyfarfod tîm rheoli digwyddiadau gyda Llywodraeth Cymru i bwyso a mesur y sefyllfa iechyd gyhoeddus bresennol. Yn ôl ystadegau a gyhoeddwyd gan Iechyd Cyhoeddus Cymru, mae Conwy wedi adrodd 21 achos newydd yn y saith niwrnod hyd at 21 Medi.
Gan roi sylwadau ar gynigion am gyfnodau clo lleol iawn, dywedodd Janet:
“Rwy’n bryderus iawn o glywed am y cynnydd diweddaraf mewn achosion o’r Coronafeirws ledled y Gogledd, gyda chyfraddau heintio mewn sawl awdurdod lleol yn destun pryder.
“Gyda chyfyngiadau pellach yn ymddangos yn anochel bellach, rwy’n galw ar Lywodraeth Cymru i wella nifer y profion sydd ar gael ledled y rhanbarth ar unwaith er mwyn gallu ystyried y data yma cyn penderfynu ar gyfnodau clo lleol iawn.
"Mae’n hollbwysig bod y mesurau a gymerir i ddiogelu’r cyhoedd yn gymesur â’r risg. Mae’n rhaid ystyried y syniad o gyfyngiadau lleol iawn er mwyn sicrhau bod cyn lleied o economi’r Gogledd â phosibl yn cau yn ystod misoedd masnach anodd y gaeaf.
“Rydw i hefyd wedi ysgrifennu’n ddiweddar at Weinidog Iechyd Cymru i ymbil am newid i’r system archebu ar-lein er mwyn gallu cynnig mwy o eglurder i rieni sy’n bryderus wrth i’r flwyddyn ysgol newydd ddechrau. Roedd hyn yn cynnwys cynigion i bob slot ar safleoedd a weinyddir gan Fwrdd Iechyd Cymru fod ar gael i’w harchebu ar ddechrau’r dydd.
“Allwn ni ddim gwaethygu’r argyfwng iechyd cyhoeddus hwn gyda difrod economaidd pellach, sy’n bygwth swyddi a bywoliaethau. Dull lleol iawn, seiliedig ar ddata yw’r ffordd ddoethaf o fynd o’i chwmpas hi gan ei fod hefyd yn ystyried effaith cyfyngiadau posibl ar iechyd meddwl ac ar lesiant cymdeithasol.”
DIWEDD
