Heddiw (22 Medi), mae Janet Finch-Saunders AS - Aelod o’r Senedd dros Aberconwy - wedi croesawu’r cyhoeddiad y bydd gwasanaethau teithwyr yn ailddechrau ar linell rheilffordd Dyffryn Conwy ddydd Llun 28 Medi 2020.
Mae’r bwriad i ailagor y llinell yn dilyn buddsoddiad o £2.2 miliwn gan Network Rail ar hyd y rheilffordd o Flaenau Ffestiniog i Landudno, gyda’r nod o wneud y rheilffordd yn fwy cydnerth i wrthsefyll tywydd garw. Yn ystod y ddwy flynedd ddiwethaf, mae’r llinell wedi cael ei golchi i ffwrdd yn rhannol yn dilyn sawl llif, gan arwain at gau a tharfu am gyfnodau maith i bobl, busnesau a chymunedau Dyffryn Conwy.
Gan roi sylwadau ar y cyhoeddiad i ailagor, dywedodd Janet:
“Dwi ar ben fy nigon gyda’r newyddion hwn gan Bartneriaeth Rheilffordd Dyffryn Conwy. Bydd y bwriad i ailagor yn rhoi sicrwydd i drigolion, sydd wedi cael eu gorfodi i ddefnyddio gwasanaethau bws amgen yn rhy aml yn y blynyddoedd diwethaf.
“O ystyried bod rheilffordd Dyffryn Conwy wedi wynebu problemau yn dilyn glaw ysgafn hyd yn oed yn y gorffennol, rwyf hefyd yn croesawu’r bwriad i osod 16,000 tunnell o falast rhwng Tal y Cafn a Llanrwst, sy’n benderfyniad doeth o ystyried ein hinsawdd newidiol a’r nifer cynyddol o achosion o lifogydd yn lleol.
“Mae National Rail yn mynnu y dylai’r amddiffynfa garreg hon helpu i arafu llifddwr a’i atal rhag ysgubo arglawdd y rheilffordd a’r balast sy’n cefnogi’r rheilffordd i ffwrdd. Byddaf yn dal ati i adolygu’r sefyllfa dros fisoedd y gaeaf er mwyn sicrhau bod yr amddiffynfa hon yn gweithio fel y dylai.
“Gyda’r addewid am amserlen fwy dibynadwy, gobeithio y bydd penllanw’r gwaith hwn yn dangos sut mae amynedd lleol wedi talu ar ei ganfed. Mae’r rheilffordd hon yn cynnig gwasanaeth hollbwysig sy’n cysylltu rhai o gymunedau mwyaf gwledig Conwy ac felly rwyf wedi ymgyrchu’n gyson am fuddsoddiad pellach i sicrhau ei dyfodol yn yr hirdymor.
“Gyda chymaint o atyniadau mawr yn y DU yn agos iawn i’r gorsafoedd, fel Gerddi Bodnant, a Pharc Cenedlaethol Eryri yn amlwg, mae’n hollbwysig bod y rheilffordd hanfodol hon yn cael ei diogelu er mwyn amddiffyn rhagolygon economaidd y Gogledd.”
DIWEDD
