Cyn dadl y Senedd ar fusnesau bach a thwristiaeth heddiw, mae’r Aelod o Senedd Cymru dros Aberconwy – Janet Finch-Saunders AS – wedi cyhoeddi y bydd yn cynnal cyfarfod digidol ar gyfer rhanddeiliaid lletygarwch i adolygu pa gymorth wedi’i dargedu sydd ei angen i helpu gydag adferiad y sector ac i fynd i’r afael â materion hirdymor fel prinder staff lletygarwch.
Cynhelir y cyfarfod Microsoft Teams rhithwir ar ddydd Mercher 11 Awst 2021, rhwng 10:00am a 11:30am. Bydd rhanddeiliaid yn derbyn gwahoddiad swyddogol cyn bo hir.
Wrth gynnig sylwadau am y cyfarfod bwrdd crwn, dywedodd Janet:
“Mae’r diwydiant lletygarwch yn hanfodol i ffyniant Cymru, gan fod o fudd i gynhyrchwyr ar draws y gadwyn gyflenwi a denu ymwelwyr sy’n dod â budd economaidd rhagamcanol i Sir Conwy o tua £900 miliwn. Maen nhw hefyd yn asgwrn cefn i economi Gogledd Cymru, gan ddarparu cyfleoedd gwaith gwerth chweil i lawer o deuluoedd lleol.
“Ond yn hytrach na chefnogi sector lletygarwch sy’n dioddef eisoes, mae Llywodraeth Cymru wedi ffafrio archwilio cyflwyno treth dwristiaeth. Nid oes unrhyw amheuaeth y byddai hyn yn drychinebus i’r diwydiant ac y byddai’n cael effaith ddwys ar nifer yr ymwelwyr â’r ardal.
“Mae’n rhaid i Fae Caerdydd geisio newid cyfeiriad y sgwrs am ein sector lletygarwch, gan gydnabod yr anawsterau a oedd yn cael eu teimlo hyd yn oed cyn y pandemig, a dyna pam rwyf i a’m cyd-Aelodau o rengoedd y Ceidwadwyr Cymreig yn galw am ddarparu grantiau i fusnesau twristiaeth er mwyn cynnal toriad Llywodraeth y DU mewn TAW i 5% tan fis Ebrill 2022.
“Ond mae’n rhaid rhoi cymorth hefyd i fynd i’r afael â materion hirsefydlog eraill, fel y prinder staff sy’n cael ei wynebu gan lawer o gwmnïau lletygarwch, a fydd yn un o gonglfeini’r trafod yn ystod fy nghyfarfod bwrdd crwn rhithwir i randdeiliaid. Bydd hefyd yn gyfle i drafod ein cynigion i greu pecyn adfer ar gyfer trefi glan môr a threfi marchnad drwy Gronfa Trefi Twristiaeth i helpu i wastadu ein cymunedau.
“Rwy’n edrych ymlaen at gyfarfod â’r rhanddeiliaid hyn ac ymrwymo i dynnu sylw at y pryderon a fydd yn cael eu mynegi.”
DIWEDD
